Caparidze dünən keçirdiyi brifinqdə bildirib ki, hazırda məsələ ilə bağlı beynəlxalq araşdırma mexanizminin yaradılması üçün müraciət ediləcək 9 beynəlxalq struktur müəyyən edilib. Onun sözlərinə görə, noyabr-dekabr aylarında rejim tərəfindən insanların sistematik şəkildə işgəncəyə məruz qalması və kimyəvi maddə ilə zəhərlənməsi faktları son həftələrdə koalisiya tərəfindən araşdırılıb və bütün zəruri sənədlər toplanıb.
"Bu sənədlər artıq beynəlxalq strukturlara elektron formada göndərilib. Bir hissəsi bu gün, qalan hissəsi isə sabah yollanacaq. Bu gün qeyri-hökumət təşkilatlarının nümayəndələri də mövzu ilə bağlı brifinq keçiriblər. Bu xüsusilə vacibdir, çünki bəzi beynəlxalq qurumlara siyasi partiyaların müraciət etmək mandatı yoxdur. Ona görə də bu mexanizmlərdən vətəndaş cəmiyyəti vasitəsilə istifadə etmək önəmlidir. Biz onlarla tam koordinasiya şəraitində işləyirik. Hər kəs bu prosesdə öz imkanları daxilində üzərinə düşəni edir ki, bu da son nəticə baxımından böyük əhəmiyyət daşıyır", - deyə Caparidze vurğulayıb.
