BAKI, 22 dekabr. TELEQRAF
Böyük Britaniyada alüminium fyuçerslərinin qiyməti bir ton üçün 2 970 dollara yaxınlaşaraq 2022-ci ilin mayından bəri ən yüksək səviyyəyə çatıb.
Teleqraf xəbər verir ki, buna səbəb Cənubi Afrikanın “South32” şirkətinin Mozambikdə yerləşən Mozal əridmə zavodunu yeni elektrik enerjisi sazişi əldə edə bilmədiyi üçün 2026-cı ilin martına qədər mühafizə və texniki baxım rejiminə keçirəcəyini açıqlaması olub.
Zavodun fəaliyyətinin dayandırılması nəticəsində gələn il qlobal alüminium təklifinin azalacağı gözlənilir.
Qiymətlərə eyni zamanda Yaponiyanın əsas limanlarında ehtiyatların azalması dəstək verib. Noyabrın sonuna ehtiyatlar aylıq müqayisədə 5,2% azalaraq 312 100 metrik tona düşüb.
Dünyanın ən böyük istehsalçısı olan Çinin isə illik 45 milyon tonluq istehsal həddinə yaxınlaşacağı gözlənilir.
Qeyd edək ki, ilin əvvəlindən bu yana alüminiumun qiyməti təxminən 17% artıb.
