Bakı, 19 dekabr 2025-ci il

Müasir nəsil musiqini, vizual təsvirləri və interaktiv elementləri vahid mədəni təcrübədə birləşdirən multisensor yanaşmanı seçir. Ekspertlərin qiymətləndirmələrinə görə, 2025-ci ildə iri miqyaslı mədəni layihələrin təxminən 75 %-i inteqrasiya olunmuş audio-vizual-interaktiv formatda həyata keçirilir ki, bu da mədəni istehlak prosesində bütün duyğu orqanlarının cəlb olunmasına yönəlmiş qlobal tendensiyanı əks etdirir. Bu kontekstdə müxtəlif bədii disiplinlərin kəsişməsində fəaliyyət göstərən və mədəni dialoqun yeni dillərini formalaşdıran layihələr xüsusi aktuallıq qazanır.

5–11 dekabr tarixlərində Azərbaycan Respublikasının Mədəniyyət Nazirliyi və İslam Əməkdaşlıq Təşkilatının (İƏT) birgə təşkilatçılığı ilə “İƏT Mədəniyyət Festivalı: Bakı Yaradıcı Həftəsi – 2025” keçirilmişdir.

Genişmiqyaslı tədbir islam dünyasının mədəni irsini, insanların yaradıcı özünüifadəsini və gənclərin innovativ təşəbbüslərini bir araya gətirmişdir.

Festivalın yadda qalan məqamlarından biri “Torpağın Səsi” (Sound of Land) platforması tərəfindən təqdim olunan audiovizual performans olmuşdur.

Rumi fəlsəfəsindən ilhamlanan performans

Festival çərçivəsində Cəlaləddin Ruminin fəlsəfəsindən ilhamlanan “Zaman dairəsindən çıx – sevgi dairəsinə daxil ol” adlı performans təqdim edilmişdir.

Layihə Heydər Əliyev Fondunun vitse-prezidenti, rəssam və şairə Leyla Əliyevanın əsərləri əsasında yaradılmış vizual kompozisiyalara söykənir. Bu əsərlər sevgi, daxili işıq və insanın təbiətlə vəhdətini simvolizə edir.

Animasiya və vizual konsepsiya Azərbaycan Respublikasının Əməkdar rəssamı, Atesh Hub platformasının təsisçisi Səbinə Şıxlinskaya tərəfindən hazırlanmışdır.
Musiqi və səs konsepsiyasının müəllifi DJ Orxan Ağayev (DJ Pancho) olmuşdur; səs tərtibatı üzərində Teymur Qasımov, animasiya və motion-dizayn üzərində isə Nigassandra və Renan Əsədov çalışmışdır.

Elektron səs və rəqəmsal vizual palitranın sintezi nəticəsində performans incəsənət və emosiyaların vahid axında birləşdiyi mənəvi bir səyahətə çevrilmişdir.

Torpağın Səsi (Sound of Land) platforması haqqında

Torpağın Səsi (Sound of Land) — türk dünyasında elektron musiqi və rəqəmsal incəsənət vasitəsilə ortaq mədəni dil yaradan beynəlxalq platformadır.
Layihə 2023-cü ildə “Yaradıcı Azərbaycan” təşəbbüsünün dəstəyi ilə təsis edilmişdir.

Platforma elektron musiqini etnik motivlər və türk xalqlarının qədim səs irsi ilə birləşdirərək gənclər üçün yeni yaradıcı imkanlar açır. Torpağın Səsi çərçivəsində DJ məktəbi, musiqi leyblı, beynəlxalq əməkdaşlıqlar və rəqəmsal incəsənət sahəsində layihələr həyata keçirilir.
Platformanın ilk iri miqyaslı tədbiri 2023-cü ildə DJ Burak Yeter və türk ölkələrindən olan gənc DJ-lərin iştirakı ilə baş tutmuşdur. 2025-ci ildə isə Torpağın Səsi “İƏT Mədəniyyət Festivalı: Bakı Yaradıcı Həftəsi – 2025” kimi mühüm beynəlxalq tədbirin iştirakçısı olmuş, müasir multidisiplinar yanaşması və təşəbbüsləri ilə seçilmişdir.

Torpağın səsi

• Təcrübə
• Yeni Nəsil
• Mədəni Dəyişiklik
• Multisensor