Ordubad Rayon Məhkəməsində qəsdən sağlamlığa az ağır zərər vurmada və xuliqanlıqda təqsirləndirilən İkram Məlikovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Tural Haqverdiyevin sədrliyi ilə keçirilən prosesdə hökm oxunub.
Məhkəmənin hökmü ilə Cinayət Məcəlləsinin 127.2.3-cü və 221.3-cü maddələri ilə nəzərdə tutulmuş cinayət əməlini anlaqsız vəziyyətdə törətmiş təqsirləndirilən şəxs cinayət məsuliyyətindən və cəzadan azad edilib İkram Məlikov barəsində tibbi xarakterli məcburi tədbirlər təyin olunub və o, sağalanadək məcburi qaydada ümumi tipli psixiatriya stasionarında müalicə ediləcək. Təqsirləndirilən şəxs barəsində seçilmiş həbs qətimkan hazırkı qərar qanuni qüvvəyə minənədək dəyişdirilmədən saxlanılıb. Qərar qanuni qüvvəyə mindikdən sonra İkram Məlikovun Azərbaycan Respublikası Səhiyyə Nazirliyinin 1 nömrəli Respublika Psixiatriya Xəstəxanasına yerləşdirilməsi qərara alınıb. Qərarın icrası Səhiyyə Nazirliyinin 1 nömrəli Respublika Psixiatriya Xəstəxanasına və Naxçıvan Muxtar Respublikası Ədliyyə Nazirliyinin Pentensiar Xidmətinin İstintaq Təcridxanasına həvalə edilib.
İttihama görə, İkram Məlikov əziyyət çəkdiyi “paranoid şizofreniya” psixi xəstəliyin təsiri altında, anlaqsız vəziyyətdə – yəni öz hərəkətlərinin faktiki xarakterini və ictimai təhlükəliliyini dərk etmək və onları idarə etmək iqtidarında olmadan – 21 iyul 2025-ci il tarixdə saat 10:20 radələrində Ordubad rayonu A.Əylis kəndi ərazisində yerləşən yanacaq doldurma məntəqəsində istifadəsində olan “VAZ-21021” markalı avtomobillə digər şəxsə məxsus, durmuş vəziyyətdə olan “VAZ-2107” markalı maşını vuraraq ona maddi ziyan yetirib.
Məlumata görə, təqsirləndirilən şəxs həmin vaxt sözügedən yanacaq doldurma məntəqəsində özünə məxsus avtomobillə Ordubad şəhər sakini, zərərçəkmiş D.D.-yə (adı, soyadı şərtidir) məxsus, durmuş vəziyyətdə olan motosikleti də vurub. Hadisə nəticəsində zərərçəkmiş şəxsə az ağır xəsarət yetirilib, həmçinin onun üzərindən avtomobillə keçməklə ictimai qayda kobud şəkildə pozulub.
Beləliklə, təqsirləndirilən şəxs şəxs üzərində zor tətbiq edilməsi ilə müşayiət olunan, cəmiyyətə açıq-aşkar hörmətsizlik ifadə edən hərəkətlər etməklə xuliqanlıq törədib.
Məhkəmə istintaqı zamanı müəyyən edilib ki, İkram Məlikov cinayət əməllərini anlaqsız vəziyyətdə törədib və onun hərəkətləri Cinayət Məcəlləsinin 127.2.3 və 221.3-cü maddələrində nəzərdə tutulan əməllərin əlamətlərini təşkil edir.
Məhkəmə iclasında dindirilmiş təqsirləndirilən şəxsin qanuni nümayəndəsi ifadəsində bildirib ki, İkram Məlikov onun doğma qardaşıdır və uzun müddətdir “paranoid şizofreniya” psixi xəstəliyindən əziyyət çəkir. Qeyd olunub ki, baş vermiş hadisə nəticəsində zərərçəkmiş şəxslərə dəymiş maddi ziyan tam ödənilib.
Kamal Məmmədov
