Ukraynanın maliyyələşdirilməsi ərəfəsində üzv ölkələr ya dondurulmuş Rusiya aktivlərinə, ya da birgə borclanmaya üstünlük verir...
Poliqon xəbər verir ki, Avropa İttifaqı ölkələri 18–19 dekabr tarixlərində keçiriləcək sammit ərəfəsində Ukraynanın maliyyələşdirilməsi məsələsində vahid mövqeyə gələ bilməyiblər. Politico nəşrinin yazdığına görə, Aİ daxilində iki əsas yanaşma formalaşıb: bir qrup ölkə dondurulmuş Rusiya aktivlərindən istifadənin zəruri olduğunu hesab edir, digər qrup isə ümumi Aİ büdcəsi ilə təmin edilən birgə borclanma mexanizmini müdafiə edir.
Mənbənin məlumatına görə, Almaniyanın başçılıq etdiyi və Şimali, eləcə də Şərqi Avropa ölkələrinin dəstəklədiyi düşərgə Ukraynaya dondurulmuş Rusiya aktivləri ilə təmin edilən reparasiya krediti verilməsini təklif edir. Bu mövqedə olan ölkələr hesab edirlər ki, hazırkı şəraitdə Kiyev üçün davamlı maliyyə dəstəyi baxımından bu mexanizmin real alternativi yoxdur.
Digər tərəfdə isə Belçika, İtaliya, Bolqarıstan, Malta, Macarıstan və Slovakiya dayanır. Bu ölkələr Ukraynaya yardım üçün Aİ səviyyəsində birgə borc buraxılmasını, yəni ümumi büdcə zəmanəti ilə maliyyə vəsaitinin cəlb edilməsini daha məqsədəuyğun hesab edirlər.
Avropa Komissiyasının sədri Ursula fon der Lyayen bildirib ki, Aİ ölkələri faktiki olaraq iki yol arasında seçim etməlidirlər: ya dondurulmuş Rusiya aktivlərindən istifadə, ya da birgə borclanma. O, mümkün kompromis variant kimi maliyyələşdirmədə 27 üzv dövlətdən yalnız 25-nin iştirakını nəzərdə tutan mexanizmin müzakirə edildiyini qeyd edib. Bu halda Ukraynaya yardımın əleyhinə çıxan Macarıstan və Slovakiya prosesdən kənarda qala bilər.
Macarıstanın baş naziri Viktor Orban isə bəyan edib ki, Rusiya aktivləri məsələsi sammitdə müzakirə olunmayacaq və danışıqlar artıq ümumi borclanma mövzusuna keçib. Lakin Aİ-də yüksək vəzifəli bir rəsmi Politico-ya açıqlamasında bu fikri təkzib edərək, Rusiya ehtiyatlarından istifadə variantının hələ də gündəmdə qaldığını təsdiqləyib.
Poliqon.info
