32-ci Ramşteyn görüşündən sonra Ukraynanın müttəfiq ölkələri 2026-cı ildə Kiyevə təxminən 20 milyard avro dəstək ayırmaq barədə razılığa gəliblər.
“Cebheinfo.az”-ın BBC Rus Xidmətinə istinadən məlumatına görə, Ukraynanın müdafiə naziri Denis Şmıxal bunu 16 dekabrda keçirilən onlayn görüşdən sonra açıqlayıb.
Almaniya gələn il Ukraynaya əsasən hava hücumundan müdafiə sistemləri, dronlar və artilleriya mərmiləri üçün 11,5 milyard avro ayırmağı öhdəsinə götürüb. Birləşmiş Krallıq Ukraynanın hava hücumundan müdafiəsini gücləndirmək üçün təxminən 684 milyon avroya bərabər olan təxminən 600 milyon funt sterlinq yardım edəcək. Norveç təxminən 7 milyard dollar (5,96 milyard avro) yardım edəcək, Hollandiya isə dronlar üçün 700 milyon avro yardım ayırıb.
Bir neçə ölkə yardımlarını ÜDM-in faizi kimi müəyyən edib: Estoniya, Latviya və Litva Ukraynaya ÜDM-nin ən azı 0,25%-i səviyyəsində, müvafiq olaraq 142 milyon avro, 110 milyon avro və 220 milyon avrodan çox dəstək verəcəklər. Danimarka (250 milyon avro), Lüksemburq (100 milyon avro) və Kanada (30 milyon Kanada dolları və ya təxminən 18,5 milyon avro) da ianələrini açıqlayıblar.
Denis Şmıhal bildirib ki, bütün öhdəliklər yerinə yetirilərsə, Ukraynaya beynəlxalq dəstəyin ümumi məbləği bu il 45 milyard dollara çatacaq ki, bu da tammiqyaslı müharibənin başlanğıcından bəri rekord göstəricidir. O, həmçinin ölkənin 2026-cı il üçün ümumi müdafiə ehtiyaclarını 120 milyard dollar olaraq qiymətləndirib ki, bunun yarısını Ukrayna daxili olaraq, qalan 60 milyard dolları isə tərəfdaşlarından ödəməyi planlaşdırır. Nazir həmçinin 15 milyard dollar (12,7 milyard avro) tələb edən PURL mexanizminin maliyyələşdirilməsinin vacibliyini qeyd edib.
Rammsteyn formatı 2022-ci ilin aprel ayından etibarən qüvvədədir və Ukraynaya hərbi yardımı əlaqələndirmək üçün NATO və AB ölkələri də daxil olmaqla 50-dən çox dövləti birləşdirir. Ukrayna Müdafiə Nazirliyinin 2025-ci ilin sentyabr ayına olan məlumatına görə, müttəfiqlər tərəfindən Kiyevə göstərilən yardımın ümumi məbləği 145 milyard dolları keçib.
Xəzər
“Cebheinfo.az”
