PSJ-nin hücumçusu Usman Dembele FIFA-nın 2025-ci il üçün “Dünyanın Ən Yaxşı Oyunçusu” seçilib.
Yeniavaz.com xəbər verir ki, mükafatlandırma mərasimi çərşənbə axşamı Dohada keçirilib.
Dembele ötən mövsüm PSJ ilə Fransa Kuboku və Çempionlar Liqası titullarını, eləcə də Çempionlar Liqasını qazanıb və turnirin “Mövsüm Oyunçusu” seçilib. 25 qolla hücumçu Fransa liqasının ən çox qol vuran oyunçusu olub.
Ümumilikdə, Dembele ötən mövsüm PSJ-də 53 oyun keçirib, 35 qol vurub və 16 məhsuldar ötürmə edib. 22 sentyabrda Dembele Fransanın “France Football” jurnalı tərəfindən 2024/25 mövsümü üçün dünyanın ən yaxşı futbolçusuna verilən “Qızıl Top” mükafatına layiq görülüb.
İlin ən yaxşı oyunçusu adına digər namizədlər arasında mərakeşli Aşraf Hakimi, portuqaliyalı Nuno Mendes və Vitinya (hamısı PSJ-dən), ingilis Harri Keyn (“Bavariya”dan), fransız Kilian Mbappe (“Real Madriddən”), ingilis Koul Palmer (“Çelsi”dən), ispanlar Pedri və Lamin Yamal, braziliyalı Rafinya (hamısı “Barselona”dan) və misirli Məhəmməd Salah (“Liverpul”dan) yer alıb.
28 yaşlı Dembele 2023-cü ildən PSJ-də çıxış edir. Hücumçu daha əvvəl 2024-cü ildə klubla Fransa liqasını və Fransa Kubokunu, 2025-ci ildə isə komanda ilə UEFA Super Kubokunu qazanıb. Dembele həmçinin Fransanın “Rennes”, Almaniyanın “Borussiya Dortmund” və İspaniyanın “Barselona” komandalarında da oynayıb və bu komandalarla üç İspaniya liqa titulunu və iki İspaniya Kubokunu qazanıb.
Fransa millisi ilə Dembele 2018-ci ildə Rusiyada keçirilən Dünya Kubokunu və 2022-ci ildə Qətərdə keçirilən Dünya Kubokunun gümüş medalını qazanıb. O, həmçinin milli komanda ilə 2024-cü ildə Avropa Çempionatında və 2025-ci ildə Millətlər Liqasında bürünc medal qazanıb.
Qeyd edək ki, “Barselona” və İspaniya milli komandasının oyunçusu Aitana Bonmati ardıcıl üçüncü dəfə mükafatı qazanaraq ilin ən yaxşı qadın oyunçusu seçilib. İlin kişi məşqçisi PSJ-nin ispaniyalı məşqçisi Luis Enrike, ilin qadın məşqçisi isə İngiltərə millisinin hollandiyalı məşqçisi Sarina Viqman olub. FIFA tərəfindən 2025-ci ilin ən yaxşı qapıçısı adına “Mançester Siti” və İtaliya millisinin üzvü Canluici Donnarumma seçilib. İlin ən yaxşı qolu üçün təqdim edilən Puşkaş mükafatının qalibi isə Argentinanın “Atletiko İndependente” klubunun 25 yaşlı müdafiəçisi Santiaqo Montiel olub.
