ain.az, Bizimyol saytından verilən məlumata əsaslanaraq xəbər yayır.
Şəhərdaxili nəqliyyatda təhlükəsizlik kəmərindən istifadə uzun illərdir məcburi olsa da, taksi və marşrut avtobuslarında bu qaydaya əməl olunmaması ciddi problem olaraq qalır. Bir çox sərnişin ya kəmərin ümumiyyətlə olmadığını, ya da işlək vəziyyətdə olmadığını bildirir. Bəzi hallarda isə sürücülər sərnişinlərdən kəmər bağlamamağı xahiş edir və ya bu məsələyə laqeyd yanaşırlar.
Sərnişinlərin sözlərinə görə, marşrut avtobuslarında ön oturacaqlarda təhlükəsizlik kəməri olsa belə, əksəriyyəti sıradan çıxıb. Taksi avtomobillərində isə arxa oturacaq kəmərlərinin gizlədildiyi, işləmədiyi və ya ümumiyyətlə çıxarıldığı hallar az deyil. Bu vəziyyət xüsusilə qəfil əyləc və yol-nəqliyyat hadisələri zamanı ağır xəsarət riskini dəfələrlə artırır.
Yol hərəkəti təhlükəsizliyi üzrə mütəxəssislər bildirirlər ki, təhlükəsizlik kəməri qəza zamanı ölüm riskini təxminən iki dəfə azaldır. Lakin ictimai nəqliyyatda formalaşmış laqeyd münasibət sürücülər və sərnişinlər arasında təhlükəsizlik mədəniyyətinin zəif olduğunu göstərir. Bir çox sürücülər qısa məsafədə hərəkət etdiklərini əsas gətirərək qaydanı pozmağı adi hal sayırlar.
Məsələnin digər tərəfi nəzarət mexanizmləri ilə bağlıdır. Sakinlər hesab edirlər ki, yoxlamalar əsasən formal xarakter daşıyır və real vəziyyət çox zaman nəzərdən qaçırılır. Nəticədə işlək olmayan kəmərlərlə xidmət göstərən nəqliyyat vasitələri rahatlıqla fəaliyyətini davam etdirir.
Ekspertlər problemin həlli üçün müntəzəm texniki baxışların gücləndirilməsini, taksi və marşrut sürücüləri üçün məsuliyyətin artırılmasını və sərnişinlər arasında maarifləndirmə işlərinin aparılmasını vacib sayırlar. Qeyd olunur ki, təhlükəsizlik kəmərinə biganə yanaşma adi qayda pozuntusu deyil, insan həyatı üçün birbaşa riskdir.
Mütəxəssislərin fikrincə, taksi və marşrutlarda təhlükəsizlik kəməri probleminin aradan qaldırılması yol qəzalarının ağır nəticələrinin azalmasında mühüm rol oynaya bilər. Əks halda, qaydalar kağız üzərində qalacaq, risk isə hər gün minlərlə sərnişini müşayiət edəcək.
Leyla Mirzə, Bizimyol.info
Ən son xəbərləri və yenilikləri almaq üçün ain.az saytını izləyin.
