Berlin danışıqları ilə bağlı nikbinliyə baxmayaraq ehtiyatlı yanaşma üçün ciddi əsaslar var...
Poliqon xəbər verir ki, Ukrayna, ABŞ və Avropa nümayəndələri arasında Berlində keçirilən danışıqlar Qərb paytaxtlarında müsbət rəy doğursa da, The New York Times bu nikbinliyə ehtiyatla yanaşmağın vacib olduğunu yazır. Qəzetin təhlilində qeyd olunur ki, prosesin uğurla nəticələnməsinə mane ola biləcək bir sıra fundamental amillər mövcuddur.
Məqalədə vurğulanır ki, əsas problemlərdən biri Rusiyanın bu danışıqlarda iştirak etməməsidir. Moskvanın prosesdən kənarda qalması istənilən razılaşmanın icrasını və davamlılığını ciddi şəkildə sual altına qoyur. NYT-nin yazdığına görə, yüksək vəzifəli rəsmilər də etiraf edirlər ki, saziş layihəsinə Ukraynanın maraqları nəzərə alınmaqla nə qədər çox dəyişiklik edilsə, Rusiya prezidenti Putini həmin sənədi imzalamağa razı salmaq bir o qədər çətinləşəcək.
Amerikalı yüksək rütbəli məmurların qəzetə bildirdiyinə görə, Putinin indiyədək izlədiyi strategiya danışıqları təşviq edirmiş kimi görünməklə paralel olaraq hərbi təzyiqi artırmaqdan ibarət olub. Onların sözlərinə görə, Rusiya demək olar ki, hər gün Ukraynanın elektrik enerjisi və istilik təchizatı infrastrukturuna zərbələr endirərək ölkə əhalisinin iradəsini sındırmağa və Kiyevi daha sərt kompromislərə məcbur etməyə çalışır.
NYT hesab edir ki, bu taktika Kremlin danışıqları vaxt udmaq və cəbhədə üstünlük qazanmaq vasitəsi kimi gördüyünü göstərir. Qəzetin qənaətinə görə, real irəliləyiş yalnız Rusiyanın prosesə cəlb olunacağı və təhlükəsizlik zəmanətlərinin aydın şəkildə müəyyənləşdiriləcəyi halda mümkün ola bilər. Əks təqdirdə, Berlin danışıqları diplomatik fəallıq görüntüsü yaratsa da, müharibənin gedişinə həlledici təsir göstərməyə bilər.
Poliqon.info
