“Rusiya Gürcüstanla münasibətləri normallaşdırmağa başlayıb”.
NOCOMMENT.az xəbər verir ki, bu barədə Rusiya Xarici İşlər Nazirliyinin MDB ölkələrinin dördüncü departamentinin direktoru Mixail Kalugin “RİA Novosti”yə müsahibəsində bildirib.
“Rusiya Gürcüstanla sabit münasibətlər qurmaqda ciddi niyyətlidir. Əsas odur ki, Tbilisi antirusiya oyunlarında alətə çevrilməsin,” – deyə Kalugin vurğulayıb.
Diplomatın sözlərinə görə, Gürcüstan tərəfi xarici siyasətində “sağlam praqmatizm” və çoxvektorlu yanaşma nümayiş etdirir. Xüsusilə, Gürcüstan antirusiya sanksiyalarına qoşulmayıb və Rusiyaya qarşı “ikinci cəbhə”nin açılması ssenarisindən imtina edib. Bu yanaşma, Kaluginin fikrincə, ölkəyə iqtisadi uğurlar əldə etməyə imkan verib.
O əlavə edib ki, rəsmi diplomatik münasibətlər mövcud olmasa da, Rusiya və Gürcüstan arasında aktiv əlaqələr saxlanılır və bu, hər iki tərəf üçün praktiki fayda verir.
