ain.az, Xalqcebhesi portalından verilən məlumatlara əsaslanaraq xəbər verir.
“Son günlər ABŞ-ın Türkiyədəki səfirinin Ankaranın S-400 hava hücumundan müdafiə sistemlərindən imtina etməyə yaxınlaşdığı ilə bağlı açıqlamasından sonra Türkiyənin yenidən F-35 proqramına qaytarılması məsələsi geniş müzakirə olunur”.
Bunu hərbi ekspert Səxavət Məmmədov Xalqcebhesi.az-a açıqlamasında bildirib.
Onun sözlərinə görə, proses ictimai rəyə yanlış təqdim olunur və sanki Türkiyənin S-400 alması birbaşa F-35 proqramından çıxarılmasının əsas səbəbi kimi göstərilir:
“Əslində məsələnin mahiyyəti tamamilə fərqlidir. Türkiyə hava hücumundan müdafiə sistemlərini gücləndirmək üçün uzun müddət ABŞ-dan ‘Patriot’ sistemlərinin satılmasını tələb edib. Lakin Vaşinqton bu sistemləri Ankaraya verməkdən açıq şəkildə imtina etdi. Məhz bu səbəbdən Türkiyə müəyyən məcburiyyət qarşısında qalaraq Rusiyadan S-400 sistemlərini aldı.S-400-lərin alınmasından sonra ABŞ bunu bəhanə edərək Türkiyəni F-35 proqramından kənarlaşdırıb.
Bu gün Türkiyə S-400-ləri qaytarsın, F-35-ə qayıtsın kimi yanaşmalar səslənir. Amma əsas sual bundan sonra ABŞ-ın Türkiyəyə real hava hücumundan müdafiə alternativi təqdim edib-etməyəcəyidir. Əəgər Türkiyə S-400-ləri Rusiyaya qaytarsa və ya üçüncü ölkəyə satsa belə, ABŞ-ın “Patriot” sistemlərini Türkiyəyə verib-verməyəcəyi açıq sual olaraq qalır.Əsas müzakirə olunmalı məsələ budur. Türkiyə hava hücumundan müdafiə sistemlərini zəiflətmə bahasına S-400-lərdən imtina edə bilməz.Ankara bu məsələdə tələsmir və mərhələli yanaşma sərgiləyir.Türkiyə ilk növbədə öz hava hücumundan müdafiə boşluğunu doldurmalıdır. Yalnız bundan sonra S-400-lərlə bağlı qərar gündəmə gələ bilər”.
Ekspert əlavə edib ki, Türkiyə F-35 proqramından çıxarıldıqdan sonra alternativ variantlar üzərində də işləyib:
“Ankara Avropanın bir sıra ölkələrinin istehsalı olan ‘Eurofighter’ qırıcıları ilə bağlı danışıqlar aparıb və bu danışıqların müsbət nəticələr verdiyini də demək olar.S-400 məsələsi F-35-dən daha çox Türkiyənin hava hücumundan müdafiə təhlükəsizliyi ilə bağlıdır.Türkiyə yeni silah sistemləri və alternativ müdafiə mexanizmləri əldə etmədən S-400-lərdən imtina etməyəcək. Bu baxımdan məsələ olduqca həssas və strateji əhəmiyyət daşıyır”.
Günel Elxan
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
