Azərbaycanda saxta fırıldaqçı telefon nömrələrinin fəaliyyəti ciddi narahatlıq doğurur. Günün istənilən saatında vətəndaşlara zəng edən, mesaj yazan, müxtəlif linklər göndərən naməlum şəxslər “asan qazanc” və “dəyərli hədiyyə” vədləri ilə insanları tora salmağa çalışır.
AzPost xəbər verir ki, fırıldaqçılar əsasən “linkə daxil ol, oyun oyna, pul qazan” və ya “kampaniyada qalib oldun” kimi cəlbedici ifadələrdən istifadə edirlər. İlk baxışdan sadə görünən bu üsullar bir çox hallarda vətəndaşların bank kartı məlumatlarının ələ keçirilməsi və hesabların boşaldılması ilə nəticələnir.
Məsələnin ən acınacaqlı tərəfi isə odur ki, bu cür tələlərə yalnız savadsız şəxslər deyil, ali təhsilli, dünyagörüşlü insanlar da düşür. Mütəxəssislərin fikrincə, fırıldaqçılar psixoloji təsir metodlarından istifadə edərək qarşı tərəfdə tələskənlik və “imkanı qaçırmamaq” hissi yaradırlar.
Nəticədə vətəndaş şübhələnmədən linkə daxil olur, şəxsi məlumatlarını paylaşır və qısa müddət sonra kart hesabındakı vəsaitin yoxa çıxdığını görür. Daha sonra zəng edən nömrə susur, mesajlar cavabsız qalır və fırıldaqçı izsiz şəkildə aradan çıxır.
Ekspertlər xəbərdarlıq edir ki, real həyatda “hamının qazandığı”, “pulsuz hədiyyə paylanan” və ya “oyunla asan pul verən” kampaniyalar mövcud deyil. Bu cür təkliflər demək olar ki, bütün hallarda dələduzluq məqsədi daşıyır.
Vətəndaşlara tövsiyə olunur ki, tanımadıqları nömrələrdən gələn zəng və mesajlara cavab verməsinlər, naməlum linklərə daxil olmasınlar, bank kartı və şəxsi məlumatlarını paylaşmasınlar. Eyni zamanda, bu cür hallarla qarşılaşdıqda hüquq-mühafizə orqanlarına müraciət etmək və yaxın ətrafı da xəbərdar etmək vacibdir.
Mütəxəssislər bir daha xatırladır: pulsuz qazanc və asan pul vədləri çox vaxt fırıldaq tələsindən başqa bir şey deyil. Vətəndaşların diqqətli və ayıq-sayıq olması bu cür cinayətlərin qarşısının alınmasında əsas şərt sayılır.
