Alimlər pankreas xərçəngi ilə əlaqəli yeni genetik nümunələr aşkar ediblər.
Hafta.az xəbər verir ki, mühüm elmi kəşfin xəstəliyin erkən mərhələdə müəyyənləşdirilməsi və vaxtında müdaxilə imkanlarını köklü şəkildə dəyişə biləcəyi bildirilir.
Hazırda pankreas xərçənginin ən geniş yayılmış forması olan pankreatik duktal adenokarsinoma (PDAC) effektiv erkən diaqnostika üsullarının olmaması səbəbindən əksər hallarda yalnız inkişaf etmiş mərhələlərdə aşkar olunur. Bu isə xəstəliyin ölümcüllük riskini əhəmiyyətli dərəcədə artırır.
Araşdırma İngiltərənin Hempşir qraflığının Sauthempton şəhərində fəaliyyət göstərən elmi qrup tərəfindən aparılıb və “Planets” xərçəng xeyriyyə təşkilatı tərəfindən dəstəklənib. Tədqiqatçılar hesab edirlər ki, əldə edilən nəticələr gələcəkdə fərdiləşdirilmiş risk proqnozlaşdırma alətlərinin hazırlanmasına zəmin yarada bilər. Bu isə həkimlərə erkən müayinəyə ehtiyacı olan şəxsləri əvvəlcədən müəyyən etməyə və potensial olaraq həyat qurtaran müalicələrə vaxtında başlamağa imkan verəcək.
Tədqiqat zamanı alimlər Böyük Britaniyada 500 min iştirakçının genetik məlumatlarını özündə birləşdirən “UK Biobank” bazasından istifadə ediblər. Məlumatların təhlili PDAC ilə əlaqəli gen variasiyalarını müəyyən etməyə imkan verib. Bu genetik göstəricilər yaş, cins və həyat tərzi amilləri ilə birlikdə qiymətləndirildikdə, xəstəliyə yoluxma riski daha yüksək olan şəxslərin əvvəlcədən müəyyənləşdirilməsinə kömək edə bilər.
Alimlər qeyd edirlər ki, bu istiqamətdə aparılan tədqiqatlar pankreas xərçənginin erkən aşkarlanması sahəsində mühüm irəliləyişlər vəd edir. /“The Independent”/
