Prezident Petr Pavel tərəfindən bu yaxınlarda Çexiyanın yeni Baş naziri təyin edilən Andrey Babiş Ukraynaya yardım barədə açıq danışıb.
Hafta.az-ın yazdığına görə, Sağçı Narazı Vətəndaşlar Hərəkatının (ANO) lideri Facebook səhifəsinə yüklədiyi videoda belçikalı həmkarı Bart De Veverlə görüşdüyünü açıqlayıb.
Babiş vurğulayıb ki, hər iki şəxs Avropa İttifaqının (Aİ) sanksiyalar səbəbindən dondurulmuş Rusiya aktivlərindən istifadə planına etiraz edib və bildirib ki, "Avropa Komissiyası Ukraynanı maliyyələşdirmək üçün başqa yollar tapmalıdır".
Çexiya mediası xəbər verir ki, əgər bu pul istifadə olunarsa və Moskva bu məsələ ilə bağlı məhkəmədə qalib gələrsə, Aİ üzvləri kompensasiyanı bölüşməli olacaq və o zaman Praqa 4,3 milyard dollar yüklə üzləşəcək.
Babiş buna işarə edərək deyib: "Başqa ölkələrə verəcək pulumuz yoxdur. Çexiya vətəndaşları üçün pula ehtiyacımız var. Xəzinəmiz boş olduğu üçün nə zəmanət, nə də pul verəcəyik".
3-4 oktyabr tarixlərində keçirilən ümumi seçkilərdə qalib gələn Babiş, mərkəz-sağ sələfi Petr Fialadan fərqli olaraq, Çexiya vətəndaşlarına üstünlük verəcəyini söyləyir.
Ötən çərşənbə axşamı baş nazir təyin olunan Babiş, 3 noyabrda radikal sağçı Azadlıq və Birbaşa Demokratiya Partiyası (SPD) və sağçı Motosikletçilər Partiyası ilə koalisiya müqaviləsi imzalayıb.
Xatırladaq ki, Aİ 210 milyard avro dəyərində Rusiya aktivlərini qeyri-müəyyən müddətə dondurmaq qərarına gəlib. Verilən açıqlamada, bu addım atılmasaydı, əlavə resursların Rusiya tərəfindən Ukraynaya qarşı müharibəni maliyyələşdirmək üçün istifadə ediləcəyi və bunun Avropa ölkələrinin iqtisadiyyatına ciddi ziyan vuracağı iddia olunub.
Bu qərarla, Rusiya dövlət aktivlərinin dondurulmasının uzadılması üçün hər altı aydan bir yekdilliklə təsdiq tələb edən proses başa çatır. Beləliklə, Macarıstan və Slovakiya kimi ölkələrin bu prosesi uzatmaqdan imtina etməsi riski aradan qaldırılır.
Aİ Komissiyası uzun müddətdir ki, Rusiyanın dondurulmuş aktivlərindən Ukraynaya təklif ediləcək kredit üçün girov kimi istifadə etmək ideyası üzərində işləyir. Plan Ukraynaya Kiyevin yalnız Rusiya müharibə təzminatını ödədiyi təqdirdə geri qaytaracağı əhəmiyyətli bir kreditin verilməsini nəzərdə tutur.
Lakin Belçikanın Baş naziri Bart de Vever, ölkəsindəki Euroclear maliyyə qurumunda saxlanılan 185 milyard avroluq Rusiya aktivlərinin Ukraynaya verilən kredit üçün girov kimi istifadəsini risklərin bölüşdürülməsi, birgə fəaliyyət və hüquqi əsasların aydın şəkildə təqdim edilməsi şərti ilə şərtləndirir.
Belçika, İtaliya, Malta və Bolqarıstanla birlikdə, Rusiya aktivləri üçün alternativ həll yolunun tapılmasını dəstəkləyir.
Aktivlərin qeyri-müəyyən müddətə dondurulması qərarı və müxtəlif zəmanətlərin verilməsi Belçikanın Rusiya aktivlərinin Ukraynaya verilən kredit üçün girov kimi istifadə edilməsi planına dəstəyini təmin etmək məqsədi daşıyır.
Bu məsələ ilə bağlı hüquqi prosedurlara başlayan Rusiya, Brüsseldəki Euroclear-dakı dondurulmuş aktivlərinin müsadirə olunacağı təqdirdə Belçikanın məsuliyyət daşıyacağını bildirir.
Rusiyanın dondurulmuş aktivləri məsələsinin 18 dekabrda Brüsseldə keçiriləcək Aİ Liderlər Zirvəsində ətraflı müzakirə ediləcəyi gözlənilir.
