Ağcabədi, 13 dekabr, Tahir Ağaməmmədov, AZƏRTAC
Respublikanın 100 min tondan çox taxıl istehsal edən rayonlarından olan Ağcabədidə 2026-cı təsərrüfat ili üçün taxıl səpini davam edir. İndiyədək rayon üzrə 17 min 471 hektarı buğda, 5708 hektarı isə arpa olmaqla 23 min 179 hektar sahədə taxıl səpini həyata keçirilib. Ümumilikdə isə cari mövsümdə gələn ilin məhsulu üçün 31 min 900 hektar sahədə taxıl səpini proqnozlaşdırılır.
Ağcabədi Dövlət Aqrar İnkişaf Mərkəzinin (DAİM) bitkiçilik sektorunun baş mütəxəssisi Ramiz Quluzadə AZƏRTAC-ın bölgə müxbirinə bildirib ki, taxıl səpini kampaniyasında 5290 ton toxum istifadə olunub. Səpinlə birlikdə sahələrə 2050 ton gübrə verilib. Fermerlər daha çox buğda və arpanın “Alekseyiç”, “Mətin”, “Qırmızıgül”, “Qarabağ-22”, “Qarabağ-33”, “Finola”, “İdra”, “Qobustan” sortlarına üstünlük verirlər.
İndiyədək 11 min 608 hektar sahədə suvarma aparılıb. Vaxtında səpin aparılmış sahələrdə normal çıxış alınıb.
Qeyd edək ki, Ağcabədi taxılçıları 2025-ci ildə 34 min 749,9 hektar taxıl sahəsindən 154 min 314 ton məhsul əldə ediblər. Hər hektarın məhsuldarlığı orta hesabla 44,4 sentner olub.
