Norveçin şimal sahilindəki Lonqirbyenə səyahət edən kontent yaradıcısı Saymon Vilson, buzla əhatə olunmuş bu şəhərdə qeyri-adi bir qayda ilə təəccüblənib. "Dünyanın ən şimal şəhəri" kimi tanınan Lonqirbyendə aşkar etdiyi bir çox qəribə detallar arasında Saymonu ən çox şoka salan şey, orada ölməyin qadağan olduğunu bildirən qeyri-adi bir təcrübə idi.
Hafta.az yazır ki, aha çox məlumat almaq üçün Saymon yerli sakin Markusla danışıb. Markus bu qeyri-adi qaydanın səbəbini ətraflı izah edib.
"Burada yaşlılara qulluq mərkəzi yoxdur. Əlbəttə ki, keçmişdə ölüm halları olub, amma ümumi təcrübə belədir: Əgər insan çox qocalıbsa və ya artıq özünə qulluq edə bilmirsə, adaya girməsinə icazə verilmir", - deyə Markus bildirib.
Saymon həmçinin adada yaşayanların qocaldıqda nə etdiklərini soruşub. Markus deyib ki, "Yerli hökumət hər kəsin yaşını və məşğulluq statusunu əhatə edən ətraflı qeyd sistemi saxlayır". O, həmçinin qeyd edib ki, sakinlər adətən 70 yaşına çatdıqda adanı tərk etməyə başlayırlar.
Norveç Elm və Texnologiya Universitetindən Kristian Meyer deyir ki, bu qanun ilk baxışdan qəribə görünsə də, əslində möhkəm elmi əsaslara əsaslanır. Kristian qadağanın səbəbini belə izah edir: "Daimi buzlaqlar təkcə bədənlərin çürüməsinin qarşısını almır; həm də ölümcül xəstəliklər daşıyan mikroorqanizmlərin uzun müddət sağ qalmasına imkan verir. Bu, insanların sonrakı həyatlarında eyni xəstəliklərə yoluxma riskini artırır. Buna görə də, bu qadağa həm gigiyena, həm də ümumi sağlamlıq təhlükəsizliyi üçün tətbiq olunur. Əgər bir insanın ölümünə yaxın olduğu düşünülürsə, onu materikə aparmaq üçün bütün vasitələr səfərbər olunur".
