Çempionlar Liqasının 6-cı turunun "Qarabağ" - "Ayaks" matçında qonaq komanda bu mövsüm yarışdakı ilk qələbəsini (4:2) qazandı.
Sportinfo.az xəbər verir ki, Amsterdam təmsilçisinin bu uğurunda komandanın fanatlarının da böyük rolu oldu.
Baxmayaraq ki, onlar ÇL-dəki əvvəlki 5 matçın hamısında uduzaraq sonuncu pillədə idilər.
Niderlandlılar Tofiq Bəhramov adına Respublika Stadionunun qapı arxasındakı tribunaların bir hissəsini tam doldurmuşdular.
Onların sayı 1400-dən çox idi. Avropadan bu qədər çox sayda xarici azarkeş Bakıya az halda gəlir.
"Ayaks" azarkeşlərinin bütün matç boyu komandalarına göstərdiyi dəstək isə yaxşı mənada heyrət doğurdu.
