Lerikdə faciə ilə nəticələnən yol qəzası baş verib. Bacısının yas mərasimindən qayıdan rayon sakini Akif Ağacanovun ehtiyatsızlığı digər bacısının həyatına son qoyub.
NOCOMMENT.az xəbər verir ki, A.Ağacanov idarə etdiyi “VAZ 2121” markalı avtomobillə paytaxtdan Lerik istiqamətinə qayıdarkən yolda nasaz qalan həmkəndliləri ilə rastlaşıb və onlara kömək etmək üçün dayanıb. Lakin dağlıq ərazidə üzü yoxuşda saxladığı avtomobil qısa müddət sonra geriyə doğru hərəkət etməyə başlayıb. Maşın yoldan çıxaraq dərəyə yuvarlanıb.
Nəticədə avtomobildə olan sərnişin – sürücünün bacısı aldığı ağır xəsarətlərdən hadisə yerində ölüb.
Hadisə ilk baxışda təsadüfi görünsə də, avtomobilin dayandırılması zamanı mühərrikin söndürülüb-söndürülmədiyi, duracaq tormozunun qoşulması, həmçinin nəqliyyat vasitəsinin texniki sazlığı ilə bağlı suallar qəzaya ehtiyatsızlığın səbəb olduğu ehtimalını gücləndirir.
Baş Dövlət Yol Polisi İdarəsi faciənin təfərrüatlarını sürücülərin diqqətinə çatdıraraq, hər kəsi təhlükəsizlik qaydalarına ciddi əməl etməyə çağırıb.
Qurum sürücülərə xatırladıb ki, etinasızlıqla ötüb keçilən ən kiçik məqam belə, kritik anda böyük faciələrə yol aça bilər.
