Rusiya Federasiyası Təhlükəsizlik Şurası sədrinin müavini Dmitri Medvedev Silahlı Qüvvələrin müqaviləli şəxsi heyətlə gücləndirilməsi ilə bağlı keçirilən iclasa sədrlik edib.
"Cebheinfo.az" xəbər verir ki, İclasda Prezident Vladimir Putin tərəfindən bu il üçün müəyyən edilmiş orduya əsgər cəlbi hədəflərinin demək olar ki, tam yerinə yetirildiyi bildirilib.
Medvedev açıqlamasında bildirib ki, 2025-ci il ərzində hərbi hissələrə 400 mindən çox müqaviləli əsgər cəlb olunub.
Bundan əlavə, 34 mindən çox şəxsin müxtəlif könüllü birləşmələrə yazıldığı da qeyd olunub.
Medvedev bu rəqəmlərin ordunun şəxsi heyət cəlb etməsində sabit bir dinamikanın formalaşdığını və vətəndaşlar arasında müqaviləli hərbi xidmətə marağın yüksək olduğunu göstərdiyini vurğulayıb.
İclasın əsas mövzularından biri, əsgər cəlbi sisteminin daha da təkmilləşdirilməsi və qarşıdakı dövrdə bu tempin qorunaraq davam etdirilməsi üçün atılacaq addımlar olub.
Medvedev bu məsələlərin ətraflı şəkildə müzakirə edildiyini və prosesin ciddi şəkildə izlənəcəyini bildirib.
Rusiya Müdafiə Nazirliyinin ordunun müasir tələblərinə uyğun olaraq müqaviləli şəxsi heyətin sayını artırmaq və bu sahədə potensialı gücləndirmək istiqamətində işlərini davam etdirəcəyi qeyd olunur.
