İsveçrənin İtalyanca danışılan bölgəsində yerləşən Lugano şəhərində mağaza və restoranların böyük əksəriyyəti artıq Bitcoin qəbul etməyə başlayıb. Şəhər idarəsi kriptovalyuta istifadəsini genişləndirmək məqsədilə ödəniş terminallarını müəssisələrə pulsuz paylayıb.
Hətta hamburger servisi edən şəbəkələrdə belə müştərilər mobil telefonlarındakı rəqəmsal cüzdan vasitəsilə təmasız ödəniş edə bilirlər. Bir fincan qəhvə üçün ödənilən məbləğ 0,00008629 Bitcoin təşkil edir ki, bu da təxminən 8,80 ABŞ dollarına bərabərdir.
Şəhər sakinləri İsveçrə frankı ilə ödəniş etməyə davam edə bilirlər, lakin təxminən 350 müəssisə Bitcoin-i də ödəniş seçimi kimi təqdim edir.
Bələdiyyə həmçinin məktəbəqədər qayğı xidmətləri də daxil olmaqla bəzi bələdiyyə ödənişlərində kriptovalyutanı qəbul etməyə başlayıb.
İsveçrədə müəyyən məbləğlərin Bitcoin olaraq rəqəmsal cüzdana yükləndiyi hədiyyə kartları da diqqət çəkir.
Müəssisələr aşağı əməliyyat xərcləri səbəbindən Bitcoin-i üstün tutur
Şəhər mərkəzindəki lüks mağazalarda da Bitcoin ilə ödəniş mümkündür. “Vintage Nassa” adlı dükanın sahibi Çerubino Fray kredit kartlarında faiz komissiyaların 1,7%-dən 3,4%-ə qədər çıxdığını, lakin Bitcoin əməliyyat xərclərinin adətən 1%-dən aşağı olduğunu qeyd edib.
Fray bu gün üçün Bitcoin ilə alış-verişlərin məhdud olduğunu qəbul etsə də, bu sahənin 5-10 il ərzində çox böyüyəcəyini vurğulayıb.
Bitcoin istifadəsini təşviq edən ən önəmli təşəbbüs isə bələdiyyənin Tether platforması ilə birlikdə 2022-ci ildə başladığı “Plan B” layihəsidir. Layihə direktoru Mir Liponi bankı ilə yaşadığı problemlər səbəbindən 11 gün boyunca yalnız Bitcoin istifadə edərək yaşamağı sınadığını və Luganoda bunun böyük ölçüdə mümkün olduğunu bildirib. Lakin ictimai nəqliyyat, yanacaq və enerji ödənişləri hələlik Bitcoin ilə ödənilə bilmir.
Dünyada kriptovalyuta təcrübələrinin qarışıq nəticələri var
Bitcoin-in rəsmi pul vahidi elan edildiyi El Salvador təcrübəsi gözləntiləri qarşılamayıb. Kripto şirkəti Unchain Data-nın rəhbəri Vinsent Çarls hökumətin stimul olaraq payladığı 30 dollarlıq Bitcoin-in əksəriyyətinin istifadəçilər tərəfindən dərhal ABŞ dollarına çevrildiyini və sistemin genişlənmədiyini qeyd edir. Digər tərəfdən, Lyublyana, Honq Konq və Zürix kimi şəhərlər kriptovalyuta dostu şəhərlər kimi diqqət çəkir.
Bitcoin müzakirələri şəhərdə gərginlik yaradır
Luganoda kriptovalyutaya qarşı olan etirazlar da nəzərə çarpır. Göl kənarındakı parkda yerləşən və Bitcoin-in yaradıcısı olduğu iddia edilən “Satoshi Nakamoto” heykəli avqust ayında vandalizm nəticəsində parçalanıb və gölə atılıb. Universitet tələbəsi Lucia kriptovalyutaları cinayət, qaranlıq internet və spekulyasiya ilə əlaqələndirdiyini, bir çox insanın isə investisiyalarında ciddi zərər gördüyünü bildirir.
Ölkə üzrə ekspertlər isə dalğalanma risklərinə diqqət çəkib. Fribourg Universitetindən prof. Sergio Rossi müəssisələrin ödəniş aldıqları zaman Bitcoin-i sürətlə İsveçrə frankına və ya başqa rəsmi valyutaya çevirmələrinin vacib olduğunu qeyd edir. Həmçinin kripto cüzdanlarının üçüncü tərəf platformalarında saxlanmasının, mümkün iflas halında bütün aktivlərin itirilmə riskini yaratdığını xatırladır. İsveçrədə isə 100 min frankadək olan bank əmanətləri dövlət təminatı altındadır ki, bu da kriptovalyutadan fərqli olaraq mühüm təhlükəsizlik üstünlüyüdür.
Bələdiyyə: Mafiya üçün Bitcoin deyil, nağd pul daha cazibədardır
Lugano bələdiyyə başçısı Mişel Foletti şəhərdə kriptovalyuta sıxlığının qanunsuz pul üçün cəlbedici olacağı iddialarını rədd edib. Foletti narkotik ticarəti kimi əməliyyatlarda cinayətkar qrupların hələ də fiziki nağd pulu üstün tutduğunu və Bitcoin-in anonimlik baxımından nağddan daha məhdud olduğunu vurğulayıb.
Bələdiyyə Bitcoin-in şəhər iqtisadiyyatına canlılıq gətirdiyini iddia edib. Folettiyə görə, 110 kripto şirkəti Luganoya köçüb və ya şəhərdə fəaliyyət göstərməyə başlayıb.
