“Ermənistan bu gün Türkiyə ilə Azərbaycan arasında öz ərazisindən tranzitə icazə verməyə hazırdır.”
Vətəninfo.az xəbər verir ki, Ermənistanın Baş naziri Paşinyan bildirib ki, Ermənistan bu gün Türkiyə ilə Azərbaycan arasında yük daşımalarına öz ərazisindən icazə verməyə hazırdır. O, bu qərarın ölkələr arasında əlaqələrin bərpası və regionda sülhün möhkəmləndirilməsi istiqamətində mühüm addım olduğunu qeyd edərək, bu cür tədbirlərin uzunmüddətli dinc birgəyaşayış üçün təməl yaratdığını vurğulayıb.
Berlində Almaniya Xarici Əlaqələr Şurası tərəfindən təşkil edilən “Ermənistanın sülhün, regional əlaqənin və AB ilə münasibətlərin institusionallaşdırılmasına yanaşmaları” mövzusunda panel müzakirəsindəki çıxışında Paşinyan həmçinin Azərbaycanın öz ərazisindən Ermənistana malların tranzitinə qoyulan məhdudiyyətlərin bu yaxınlarda qaldırılmasını təqdir edib və bunu Yerevan üçün tarixi hadisə adlandırıb.
Həmçinin, regional əlaqənin müzakirəsi zamanı Baş nazir Orta Dəhliz üçün “Tramp marşrutu” layihəsinin əhəmiyyətini qeyd edib. O, vurğulayıb ki, bu layihə Avropa, Cənubi Qafqaz və Mərkəzi Asiya arasında maneəsiz əlaqənin təmin edilməsində əsas elementə çevrilə bilər.
Paşinyan təşəbbüsün həyata keçirilməsinə gələn il başlayacağına və regionda sülhə və sabitliyə töhfə verəcək əlavə əlaqələr yaradacağına əminliyini bildirib.
