Böyük hasilat artımı, zəif iqtisadiyyat və tələbin yavaşlaması qiymətlərə uzunmüddətli təzyiq yaradır…
Poliqon xəbər verir ki, The Financial Times analitiklərinin proqnozuna görə, 2025-ci ildə dünya neft bazarı son illərdə nadir görülən miqyasda “superartıq” vəziyyətə düşə bilər. Bu profisit həm hasilatın kəskin yüksəlməsi, həm də qlobal iqtisadi zəifləmə ilə paralel şəkildə formalaşır.
Analitiklər bildirirlər ki, profisiti şərtləndirən əsas amil Braziliya və Qayanada iri hasilat layihələrinin tam gücü ilə işə düşməsi, eyni zamanda bir sıra digər regionlarda hasilatın bərpa edilməsidir. Bu, qlobal təklifin tarazlığı pozacaq qədər böyük həcmdə artım deməkdir.
Qlobal tələbin zəifləməsində Çinin rolu xüsusi vurğulanır. Dünyanın ən böyük neft idxalçısı olan ölkədə elektromobillərin sürətlə yayılması benzin və dizelə olan tələbi əhəmiyyətli dərəcədə azaldır. Nəticədə istehlak artımı gözlənildiyindən daha yavaş gedir. Analitiklərin sözlərinə görə, Çin ucuz qiymətlərdən yararlanaraq strateji ehtiyatlarını doldursa da, tələbin konsentrasiyası zəiflədiyi halda profisit daha tez üzə çıxa bilər.
Qiymətlərə əlavə təzyiq ABŞ siyasətindən qaynaqlanacaq. Prezident Donald Trampın “drill, baby, drill” şüarı ilə çıxış etdiyi aqressiv hasilat genişləndirmə planları ABŞ neftinin qlobal bazara daha çox çıxmasına səbəb olacaq. Bu isə həm təklifi artıracaq, həm də OPEC+ mexanizmlərinin bazarı sabit saxlamaq imkanlarını məhdudlaşdıracaq.
The Financial Times yazır ki, zəif iqtisadi perspektivlər, yüksək bazar volatilliyi, ticarət müharibələri və dəyişən istehlak modelləri neftə olan tələbin strukturunu yenidən formalaşdırır. Bütün bunlar qlobal bazarın uzunmüddətli eniş dövrünə qədəm qoyduğunu göstərir və qiymətlərin gələcəkdə daha aşağı diapazonda formalaşa biləcəyinə işarə edir.
Poliqon.info
