"Grand Agro" şirkətinin əməliyyatlar üzrə rəhbəri Azər Aslanov ilə söhbət.
- İlk öncə sizi təbrik etmək istəyirəm. "Olivea" zeytun yağının Rusiya Keyfiyyət Sisteminin testlərində lider markalar arasında yer alması böyük uğurdur.
- Təşəkkür edirəm. Bu, bizim üçün son dərəcə önəmli və qürurverici bir nailiyyətdir.
-Bu uğurun əsasında nə dayanır?
- Bildiyiniz kimi, "Grand Agro" mərkəzi Avropa, keçmiş MDB məkanı və Cənub-Şərqi Asiya regionunda ən böyük zeytun bağlarına sahib şirkətdir. Bizim üçün hər bir uğur təsadüfi hadisə deyil, uzunmüddətli strategiya və planlı prosesin nəticəsidir.
Keyfiyyət istiqamətində ərsəyə gətirdiyimiz bu nəticə təkcə Rusiya Keyfiyyət Sisteminin qiymətləndirməsi ilə məhdudlaşmır. 2025-ci ildə İngiltərə, BƏƏ və Kanadada keçirilən nüfuzlu zeytun yağı keyfiyyəti üzrə müsabiqələrdə də "Olivea" markası qızıl medallarla təltif olunmuşdur.
Bu uğurların bünövrəsində isə son iki il ərzində yüzlərlə əməkdaşımızın zəhməti dayanır. Bu, kompleks qərarların, elmi əsaslı aqrotexniki tədbirlərin, istehsalat prosesinə ciddi nəzarətin və ən müasir texnologiyaların tətbiqinin nəticəsidir. Məhsulun keyfiyyəti bizim dəyişməz prioritetimizdir və "Olivea" bu siyasətin bariz nümunəsidir.
- Bu nailiyyət ölkə iqtisadiyyatı üçün hansı önəmi daşıyır?
- İlk olaraq qeyd etmək istəyirəm ki, Azərbaycan qida məhsullarının premium seqmentdə aparıcı Avropa markaları ilə eyni səviyyədə, bəzi hallarda isə daha yüksək nəticələr göstərməsi ölkəmizin brend dəyərinə ciddi töhfə verir. Bu uğur göstərdi ki, Azərbaycan istehsalı olan yüksək keyfiyyətli məhsullar beynəlxalq bazarlarda rəqabətədavamlıdır və müstəqil keyfiyyət testlərində liderlik edə bilir.
Bu nəticə həm də ölkəmizin aqrar-sənaye potensialına, xüsusilə də zeytunçuluq sektoruna olan inamı daha da artırır. Xarici bazarlarda tanınma və etibarın yüksəlməsi ixrac imkanlarını genişləndirir, yeni bazarlara çıxışı asanlaşdırır və ölkəyə əlavə valyuta axını yaratmaqla iqtisadiyyata müsbət təsir göstərir.
Eyni zamanda, bu kimi nailiyyətlər yerli istehsala, innovasiyalara və kənd təsərrüfatında modern idarəetmə modellərinə olan marağı artırır, nəticədə sektorda ümumi inkişaf dinamikasını gücləndirir.
- Azərbaycanda buna oxşar bir araşdırma daha öncə aparılıbmı?
- Təəssüf ki, xeyr. Bu günə qədər ölkəmizdə zeytun yağı üzrə genişmiqyaslı, beynəlxalq standartlara əsaslanan müstəqil keyfiyyət araşdırmaları həyata keçirilməyib. Baxmayaraq ki, bu sektorda fəaliyyət göstərən və bizimlə yanaşı yerli məhsul istehsal edən şirkətlər bir neçə dəfə belə təşəbbüslərlə çıxış etmişdilər, müxtəlif səbəblərdən bu cür tədqiqatlar praktik mərhələyə keçməyib.
Ümid edirik ki, əldə etdiyimiz nəticələr və beynəlxalq reytinqlərdə nümayiş etdirdiyimiz uğurlar yerli bazarda da marağı artıracaq və yaxın gələcəkdə Azərbaycanda da oxşar araşdırmaların aparılmasına təkan verəcək. Bu, həm istehsalçılar, həm istehlakçılar, həm də ümumilikdə sektor üçün çox faydalı olardı.
- Bildiyimizə görə bu il "Grand Agro" badam üzrə də mühüm nailiyyətlər əldə edib. Bu barədə məlumat verə bilərsinizmi?
- Bəli, tamamilə doğrudur. Bu il ilk dəfə olaraq badam sahələrimizdə həm rekord həcmdə, həm də yüksək keyfiyyətdə məhsul əldə etmişik. Bu nəticə uzunmüddətli aqrotexniki strategiyamızın, düzgün sort seçiminin, suvarma və gübrələmə sistemlərinin optimallaşdırılmasının, eləcə də komandamızın böyük zəhmətinin birbaşa bəhrəsidir.
Badam bağlarımızda tətbiq etdiyimiz müasir aqrar texnologiyalar və idarəetmə metodları məhsuldarlığı əhəmiyyətli dərəcədə artırdı və nəticədə bazar tələblərinə uyğun, ixrac potensialı yüksək olan məhsul əldə olundu. Bu nailiyyət həm şirkətimiz, həm də ölkənin bağçılıq sektorunun inkişafı baxımından mühüm əhəmiyyət daşıyır.
"Olivea" zeytun yağının beynəlxalq testlərdə lider markalar sırasında yer alması və badam istehsalında əldə etdiyimiz rekord nəticələr "Grand Agro"nun qeyri-neft sektorunun inkişafına verdiyi mühüm töhfənin göstəricisidir. Biz Azərbaycan məhsullarını dünya bazarında daha da tanıtmaq və ölkəmizin aqrar potensialını yüksəltmək üçün ardıcıl şəkildə çalışacağıq.
Sonda bir daha vurğulamaq istəyirəm ki, uğur hadisə deyil, prosesdir.
