Valideynlər övladlarının gələcəyi üçün erkən maliyyə planlamasına üstünlük verir və uşaqların adına bank hesabı açmağa maraq artır. Lakin prosesin qanunvericiliyə uyğun həyata keçirilməsi üçün müəyyən tələblər mövcuddur. AzPost mövzunu rəsmi qaydalara əsaslanaraq izah edir.
Mövcud qanunvericiliyə görə, 18 yaşına çatmayan şəxsin adına bank hesabı və debet kartı yalnız valideynin və ya qanuni qəyyumun iştirakı ilə açıla bilər. Hesab uşağın adına rəsmiləşdirilsə də, istifadəsi tam şəkildə valideynin nəzarətində olur. Bu, Mülki Məcəllədə göstərilən yetkinlik yaşına çatmayanların maliyyə əməliyyatları ilə bağlı müddəalarla tənzimlənir və bankların daxili qaydalarında da əksini tapır.
Kart və hesab açmaq üçün adətən aşağıdakı sənədlər tələb olunur:
Uşağın doğum şəhadətnaməsi;
Valideynin şəxsiyyət vəsiqəsi;
Valideynin bankda ərizə doldurması;
Bəzi hallarda qeydiyyat ünvanını təsdiq edən sənəd.
Bank məhsullarının şərtlərinə əsasən, uşaqlar üçün yalnız debet kartı əldə etmək mümkündür. Kredit kartları yetkinlik yaşına çatmayanlara verilmir. Həmçinin bəzi banklar 14 yaşdan yuxarı yeniyetmələrə limitli debet kart təqdim edir, lakin nəzarət yenə də valideynə aid olur.
Ekspertlərin fikrincə, uşağın adına hesab açılması bir sıra üstünlüklər yaradır: pulun təhlükəsiz saxlanması, gələcək üçün vəsait toplamaq imkanı, ailənin büdcə nəzarətinin asanlaşması, eləcə də uşaqlarda maliyyə savadlılığının formalaşması. Hesabda toplanan vəsaitlərə təqaüd, hədiyyə və digər ödənişlərin yönləndirilməsi də geniş tətbiq edilir.
Qaydalara əsasən, hesab üzərində tam mülkiyyət hüququ yalnız 18 yaş tamam olduqdan sonra uşağa keçir. Bu vaxta qədər hesab və kartla bağlı bütün qərarlar valideyn və ya qəyyum tərəfindən verilir.
