Almaniyalı milyarder Fridhelm Loh özünə məxsus, dəyəri 1,5 milyard dollar olan hiperkar və klassik avtomobil kolleksiyasını artıq ictimaiyyətə açıb.
Publika.az xəbər verir ki, illərdir qapalı saxlanılan bu kolleksiya indi Frankfurt yaxınlığında yerləşən muzeydə nümayiş olunur.
Frankfurtdan təxminən bir saatlıq məsafədə fəaliyyət göstərən "Nationales Auto Museum" Lohun yüzlərlə nadir avtomobilini bir araya toplayıb. Burada ziyarətçilər həm müasir hiperkarları – "Bugatti Centodieci", "Mercedes-AMG One", "Lamborghini Aventador SVJ" kimi modelləri, həm də "Formula 1" bolidləri, "Le Man" prototipləri və BMW-nin turinq avtomobilləri kimi motorsport əfsanələrini görə bilirlər.
"Ferrari F40" və "Mercedes-Benz CLK GTR" kimi tarixi ikonlar ən yeni superkarlarla yanaşı nümayiş olunur və bu ekspozisiya mühəndislik inkişafının onilliklərə yayılan bir mənzərəsini təqdim edir. Avtomobillər geniş zallarda, çoxsəviyyəli stendlərdə və hər bir modelin dizaynını və tarixini vurğulayan mərkəzi, əyri salon hissəsində sərgilənir.
