ABŞ Prezidenti Donald Tramp, "Netflix"in "Warner Bros"u satın alma razılaşmasının “müəyyən bir prosesdən keçməli olduğunu” və qərara özünün də daxil olacağını söyləyib.
Marja xəbər verir ki, Tramp, "Kennedy Center"də iştirak etdiyi bir tədbirdə jurnalistlərin suallarını cavablandırıb.
"Netflix"in "Warner Bros"u satın almaq üçün razılığa gəlməsi ilə bağlı suala cavab olaraq Tramp deyib: “Bu, bir prosesdən keçməlidir və nə olacağını görəcəyik.”
Tramp, "Netflix"in “əla bir şirkət” olduğunu, “mükəmməl iş gördüyünü” qeyd edərək, "Netflix"in İcraçı Direktoru (CEO) Ted Sarandosa böyük hörmət bəslədiyini, lakin şirkətin bazar payının çox böyük olduğunu vurğulayıb.
“Böyük bazar payı — bu bir problem ola bilər”
“Netflix"in "Warner Bros"u almasına icazə verilməlidirmi?” sualını cavablandıran Tramp deyib: “Məsələ də budur. Onların çox böyük bazar payı var və "Warner Bros"u aldıqda bu pay daha da artacaq.”
Tramp, bu qərara özünün də daxil olacağını qeyd edərək əlavə edib: “Ancaq bu, böyük bir bazar payıdır, bu bir problem ola bilər.”
"Netflix" 5 dekabrda film və televiziya studiyaları ilə yanaşı "HBO Max" və HBO-nu da əhatə edəcək şəkildə "Warner Bros"u 72 milyard dollarlıq nizamnamə kapitalı və 82,7 milyard dollarlıq ümumi şirkət dəyəri ilə satın almaq üçün "Warner Bros. Discovery" ilə razılığa gəldiyini açıqlamışdır.
