Bizimyol saytına istinadən ain.az xəbər verir.
Son həftələrdə Bakının müxtəlif rayonlarında həm çoxmərtəbəli yaşayış binalarında, həm ticarət-obyektlərində, həm də kiçik mənzil və pərakəndə müəssisələrdə ard-arda yanğın hadisələrinin baş verməsi ictimaiyyətdə ciddi narahatlıq doğurub. Bu “yanğın dalğası” sadəcə təsadüf deyil. Onun arxasında uzun müddət toplanmış struktur elektrik, tikinti, təhlükəsizlik və sosial problemlər dayanır.
Əvvəla, rəsmi statistikalar göstərir ki, ölkədə yanğın hadisələrinin böyük hissəsi məhz yaşayış binalarında olur. Müvafiq analizlərə görə, belə yanğınların təxminən yarısı elektrik sistemlərinin quraşdırılması və istismarı zamanı yanğın təhlükəsizliyi qaydalarının pozulması səbəbindən baş verir.
Yaxın günlərdə yayılan xəbərlər də bunu təsdiqləyir. Bir çox yanğın elektrik şaftlarının, naqillərin qısaqapanması, köhnəlmiş və ya standartlara uyğun quraşdırılmamış elektrik sistemləri səbəbindən başlayıb. Məsələn, son zamanlar yüksək mərtəbəli bina, mətbəx, elektrik şaftı və mənzil daxilində baş vermiş yanğınlar sırasında belə elektrik nasazlığı ilə bağlı hallar üstünlük təşkil edir.
Digər problem isə tikinti və binaların istismarında təhlükəsizlik normalarına əməl olunmamasıdır. Ekspertlər bildirirlər ki, yeni və köhnə binalarda yanğın xəbərdaredici sistemlərin olmaması, ilkin yanğınsöndürmə vasitələrinin yoxluğu, təxliyə və çıxış yollarının düzgün planlaşdırılmaması riskləri əhəmiyyətli dərəcədə artırır.
Bundan əlavə, rütubət, istilik sistemlərindən və köhnə ev şəbəkələrindən aşırı istifadənin artması da xüsusilə soyuq aylarda təhlükəni gücləndirir. Ekspertlər vurğulayırlar ki, elektrik şəbəkəsinin normadan artıq yüklənməsi, köhnəlmiş kabellər, keyfiyyətsiz materiallar bu dövrdə daha çox qısaqapanma və yanğın riskinə səbəb olur.
Problemdə həm də “insan faktoru” mühüm rol oynayır. Siqaretin düzgün söndürülməməsi, soba və istilik cihazlarının təhlükəli istifadəsi, elektrik “çoxaltma”lardan istifadə, ehtiyatsızlıq və s. yanğınların ən çox rast gəlinən səbəblərindəndir.
Yanğın hadisələrinin artması yalnız maddi ziyanla bitmir. Bəzən xəsarətlərə, insanların sağlamlığına və təhlükəsizliyinə ciddi təhlükə yaradır, həmçinin ctimai etimadsızlıq, narazılıq və sosial gərginlik doğurur.
Bu günlərdə yaşanan hadisələr bir daha göstərdi ki, əgər elektrik-tikinti infrastrukturuna laqeydlik və təhlükəsizlik sistemlərinə əməl etməmək davam edərsə, yanğın riski tək bir binada deyil, bütöv bir rayon və ya yaşayış kompleksində faciəyə çevrilə bilər.
Leyla Mirzə, Bizimyol.info
Daha ətraflı məlumat və yeniliklər üçün ain.az saytını izləyin.
