Bakı, 5 dekabr, AZƏRTAC
5 dekabr – Beynəlxalq Könüllülər Günüdür. Ölkəmizdə fəaliyyət göstərən könüllülük proqramları arasında Kiçik və Orta Biznesin İnkişafı Agentliyinin (KOBİA) “KOB könüllüləri” proqramı idarəetmə, biznes və menecment sahələri üzrə təhsil alan gənclərin bilik və bacarıqlarının artırılması ilə seçilir.
AZƏRTAC KOBİA-ya istinadla xəbər verir ki, 2018-ci ildən həyata keçirilən proqram çərçivəsində gənclər real tapşırıqların və layihələrin icrasında, tədbirlərin təşkili və sahibkarlara göstərilən xidmət prosesində iştirak etməklə praktik bacarıqlar əldə edir, ilkin əmək vərdişlərinə yiyələnirlər.
Hazırda agentlikdə 30-dan çox könüllü fəaliyyət göstərir. Ümumilikdə 2025-ci ildə 90-dan çox, indiyədək isə 295-i qadın və 554-ü kişi olmaqla 850-yə yaxın gənc proqram çərçivəsində KOBİA-da könüllü fəaliyyətinə cəlb olunub. KOB könüllüləri arasında Azərbaycan Respublikasının Prezidenti yanında Dövlət İdarəçilik Akademiyasının, Bakı, Sumqayıt və Mingəçevir dövlət universitetlərinin, Azərbaycan Dövlət İqtisad Universitetinin, Azərbaycan Dillər Universitetinin, Azərbaycan Pedaqoji Universitetinin, Bakı Mühəndislik Universitetinin, Bakı Slavyan Universitetinin tələbə və magistrları üstünlük təşkil edir.
Könüllülük KOBİA-nın insan kapitalı strategiyasının ayrılmaz hissəsidir. Bu çərçivədə aktivliyi və təşəbbüskarlığı ilə seçilən 20 gənc agentlikdə işə qəbul olunub.
Ali və orta ixtisas müəssisələrində təhsil alan gənclər könüllü fəaliyyəti üçün KOBİA-ya müraciət edə bilərlər. KOBİA-da könüllü kimi fəaliyyət göstərmək istəyənlər agentliyin rəsmi internet səhifəsində (www.smb.gov.az) yerləşdirilmiş “KOB könüllüsü ol” bölməsi vasitəsilə qeydiyyatdan keçə bilərlər. Müraciətlər müəyyən edilmiş meyarlara əsasən qiymətləndirilir və seçilən namizədlər proqramda iştirak üçün dəvət olunur. Proqramı uğurla tamamlayan “KOB könüllüləri”nə 3 ay davam edən könüllü fəaliyyətinə dair sertifikat təqdim edilir.
Beynəlxalq Könüllülər Günü ilə bağlı KOBİA-nın İdarə Heyətinin sədri Orxan Məmmədov agentliyin könüllüləri ilə görüşüb. Görüşdə könüllülərin gündəlik fəaliyyəti və gələcək karyera planları ilə bağlı fikir mübadiləsi aparılıb. Könüllülərə göstərdikləri dəstəyə görə təşəkkür edilib və gənclərin inkişafına yönəlmiş təşəbbüslərin davam etdiriləcəyi vurğulanıb. Görüş çərçivəsində könüllü fəaliyyətini başa vuran gənclərə sertifikatlar təqdim olunub.
