Bakı, 5 dekabr, Günel Türksoy, foto Tofiq Babayev, AZƏRTAC
Azərbaycanın işğaldan azad edilmiş ərazilərdə həyata keçirdiyi genişmiqyaslı bərpa və quruculuq işləri keyfiyyətinə və miqyasına görə nümunəvi hesab olunur. Hazırda postkonflikt ərazilərin bərpası dünyada aktual olan bir çağırışdır. Bu sahədə Azərbaycanın təqdim etdiyi model də özü-özlüyündə çox böyük maraq doğurur. İşğaldan azad edilmiş ərazilərdə hər bir kəndin və şəhərin Baş Planının hazırlanması, bu prosesdə aparıcı beynəlxalq məsləhətçilərlə əməkdaşlığımız nəticəsində ərsəyə gələn layihələr bu sahənin peşəkarları üçün maraq kəsb edir. Biz çalışacağıq ki, WUF13-də müxtəlif formatlarda imkanlardan istifadə edərək işğaldan azad edilmiş ərazilərdə həyata keçirilən genişmiqyaslı bərpa və quruculuq işlərindən danışaq və bu istiqamətdə dünyanın mərkəzi və yerli hökumətlərinin nümayəndələri ilə açıq dialoq aparaq.
Bunu AZƏRTAC-ın əməkdaşının sualına cavab olaraq Dövlət Şəhərsalma və Arxitektura Komitəsinin sədri, WUF13-ün milli koordinatoru Anar Quliyev deyib.
A.Quliyev qeyd edib ki, BMT-nin Ümumdünya Şəhərsalma Forumunun 13-cü sessiyasının (WUF13) əsas mövzusu hər kəs üçün yaşayış yerlərinin təmin edilməsinə həsr edilib və burada təhlükəsiz, dayanıqlı şəhərlərin, yaşayış məskənlərinin necə yaradılması haqqında müzakirələr aparılacaq: “Bu mövzu ətrafında Azərbaycanın paylaşa biləcəyi kifayət qədər məlumat var. Həmçinin öyrənməli olduğumuz da bir sıra məsələlər də mövcuddur. Forumda işğaldan azad edilmiş ərazilərdə ayrı-ayrı şəhərlərin Baş Planı, memarlıq, nəqliyyat, kommunikasiya, infrastruktur layihələri barədə məlumatları təqdim edəcəyik. Bu işləri artıq biz bir neçə ildir ki, beynəlxalq tədbirlərdə təqdim edirik. Sözsüz ki, WUF13-də də bu imkanlardan yararlanacağıq”.
