Tayvan Milli Universitetinin alimləri qaraciyər xərçəngi riskini xəstəlik yaranmazdan illərlə əvvəl müəyyən etməyə imkan verən sadə üsul hazırlayıblar.
AzPost xəbər verir ki, tədqiqatın nəticələri Clinical and Molecular Hepatology (CMH) jurnalında dərc olunub. Yeni SAFE sistemi xəstəliyin ehtimalını dörd əsas parametr üzrə proqnozlaşdırır: yaş, bədən kütləsi, diabet mövcudluğu və adi qan analizləri (qaraciyər fermentləri, trombositlər və qlobulinlər daxil olmaqla).
Alimlər təxminən 13 min xəstəni və sağlam könüllünü araşdırıblar. Nəticələr göstərib ki, SAFE dəyəri 100-dən yüksək olduqda, qaraciyər xərçəngi riski orta hesabla 7,5 dəfə artır. Sistem xüsusilə hepatit, spirtlə əlaqəli qaraciyər zədələnməsi və piylənmiş qaraciyər xəstələri üçün effektivdir.
Böyük xarici nümunələrdə, 120 min insanın məlumatları ilə də nəticələr təsdiqlənib. Mütəxəssislər vurğulayıblar ki, SAFE vasitəsilə kimlərin mütəmadi müayinəyə ehtiyacı olduğunu və kimlərin riskinin minimal olduğunu dəqiq müəyyən etmək mümkündür.
Alimlərin ümidinə görə, bu sadə alət yaxın gələcəkdə klinik praktikaya daxil edilərək təhlükəli dəyişiklikləri erkən mərhələdə aşkar etməyə kömək edəcək.
