Hindistanın hava çirkliliyi ilə mübarizə aparan Dehli Milli Paytaxt Regionunda 2022–2024-cü illər ərzində 6 dövlət xəstəxanasında 200 mindən artıq kəskin tənəffüs yolu infeksiyası qeydə alınıb.
Hindistanın NDTV kanalının xəbərinə görə, Hindistan Səhiyyə və Ailə Rifahı Nazirliyi ilə Hindistan Tibbi Tədqiqatlar Şurası (ICMR) şəhər ərazilərində artan hava çirkliliyi ilə tənəffüs yolu xəstəlikləri arasındakı əlaqəni araşdırıb.
Nazirlik rəsmiləri araşdırmanın nəticələri barədə parlamentdə çıxış edərək kəskin tənəffüs yolu infeksiyası halları ilə hava çirkliliyi səviyyəsi arasında birbaşa əlaqənin müəyyən edildiyini bildiriblər.
Açıqlamada qeyd edilib ki, 2022–2024-cü illər ərzində Dehlidəki 6 dövlət xəstəxanasına 200 mindən çox şəxs kəskin tənəffüs yolu infeksiyası şikayəti ilə müraciət edib.
Paylaşılan məlumata görə, həmin 6 böyük xəstəxanada 2022-ci ildə 67 054, 2023-cü ildə 69 293, 2024-cü ildə isə 68 411 kəskin tənəffüs yolu infeksiyası qeydə alınıb.
Yoluxanların 30 420-nin, yəni təxminən 15 faizinin xəstəxanaya yerləşdirildiyi, xüsusilə 2024-cü ildə xəstəxanaya yatırılanların sayında kəskin artım müşahidə olunduğu vurğulanıb.
Bundan əlavə, 2022–2025-ci illər ərzində, xüsusən də Dehlidə astma, KOAH və ağciyər infeksiyaları səbəbilə ayıq müalicə və xəstəxanaya yerləşdirmə hallarının artdığı qeyd edilib.
Bu statistika bölgədə ciddi problemə çevrilən hava çirkliliyi böhranının sağlamlığa vurduğu zərəri bir daha ortaya qoyur.
