Xəbər verdiyimiz kimi Milli Şuranın tanınmış simalarından olan Gültəkin Hacıbəyli Türkiyədə saxlanılıb və onun Azərbaycana ekstradisiya olunması məsələsi gündəmdədir.
Saxlanılma yalnız miqrasiya və oturum qaydaları ilə bağlı deyil – əsas məsələ Ramiz Mehdiyev işi ilə əlaqəli aparılan geniş istintaq çərçivəsində onun ifadəsinin alınmasıdır. Mənbələrin bildirdiyinə görə, Hacıbəyli faktiki olaraq Azərbaycan hüquq-mühafizə orqanlarının sorğusu əsasında polis nəzarətinə götürülüb və Bakıya gətirilməsi gözlənilir.
Xatırladaq ki, Ramiz Mehdiyev Səbail rayon məhkəməsinin hökmü ilə ev dustaqlığına məhkum edildiyi günlərdə Gültəkin Hacıbəyli ölkəni tərk etmişdi. O vaxt “qaçmaq” iddialarını təkzib edərək övladının yanına, Türkiyəyə gedib orada qalmaq istədiyini demişdi. Lakin onun sosial şəbəkədə yayımladığı son açıqlamaya əsasən, Türkiyədə oturum müddətinin bitməsinə bir ay qalıb və iki illik oturum (yaşama) hüququ var. Buna baxmayaraq, Türkiyə polisi onu saxlayıb. Özü bu detalı Facebook səhifəsində belə yazıb: “İndicə oğlumla birlikdə İstanbulda kirayədə yaşadığım evin qapısını döydülər, əmniyyətdən gəliblər, məni “karakola” aparırlar. Heç bir səbəb yoxdur, Türkiyəyə 25 sentyabrda gəlmişəm, 3 aylıq müddətim bitməyib, üstəlik iki illik oturma iznim var. Azərbaycan hökumətinin sifarişi ilə çox güman ki, Türkiyədən deportasiya olunacağam...
Mən əmniyyət işçilərinə “sabah saat 9-da İELTS imtahanım var, onu verib gələcəyəm” desəm də, görünür, sifariş çox sərt olduğu üçün şans vermədilər.
Ramiz Mehdiyevlə əlaqəsi olandan şərəfsiz insan yoxdur, günahsız olduğum halda məni şərləyənləri Allaha tapşırıram!”
Gültəkin Hacıbəyli iddia edir ki, onun Mehdiyevlə əlaqəsi yoxdur, şərlənib. Lakin faktlar və Hacıbəylinin siyasi həyatından internetdə qalan izlər başqa şey deyir… Musavat.com-un əldə etdiyi məlumata görə, Gültəkin Hacıbəylinin saxlanılması Ramiz Mehdiyev işi üzrə aparılan istintaqın genişlənməsi ilə birbaşa əlaqəlidir. Artıq Azərbaycanda Əli Kərimli, AXCP funksioneri Məmməd İbrahim və digər saxlanılan şəxslərin ifadələri alınır. Bununla yanaşı, Milli Şuranın, bir zamanlar fəaliyyət göstərən “Ziyalılar İttifaqı”nın, İctimai Palatanın bir sıra üzvləri də şahid qismində istintaqa cəlb edilib. Artıq onlardan ilkin ifadələr alınıb.
Gültəkin Hacıbəylinin adı isə bu prosesdə təsadüfi keçmir. Məsələ heç də özünün yazdığı kimi deyil. Gültəkin xanımın uzun illər ərzində Ramiz Mehdiyevlə yaxın və birbaşa siyasi əlaqələri olub. Onun karyerasında, deputat olmasında R. Mehdiyev birbaşa və əsas rol oynayıb. Bunu keçmiş deputatın təqdim etdiyimiz videodakı səmimi, sevgi dolu açıqlaması da sübut edir. Bu videoda Gültəkin Hacıbəyli Ramiz Mehdiyev barədə ən yaxın, ən doğma adamı kimi danışır, onu vəsf edir, az qala eşq elan edir.
2013-cü ildə Milyarderlər İttifaqının Rusiya xətti üzrə formalaşdığı, Azərbaycan siyasətinə müdaxilə planlarının aktivləşdiyi, Milli Şura adlı bir qurumun yaradıldığı dövrdə Gültəkin Hacıbəyli qəfil şəkildə iqtidar düşərgəsindən ayrılaraq müxalifətə keçdi. Keçdi və düz birbaşa Əli Kərimlinin yanıbaşında qərar tutdu. Onu Milli Şuranın rəhbərliyinə gətirdilər. O vaxtdan bəri müxtəlif iddialar səsləndirilirdi ki, Hacıbəylinin Milli Şuraya və xüsusilə Əli Kərimlinin yaxın siyasi orbitinə daxil olması Moskva–Bakı xətti üzrə ortaq layihə olan “Milyarderlər İttifaqı” prosesinin bir hissəsidir.
“Milyarderlər İttifaqı”nın Bakı ilə əlaqələrini təşkil edən Abbas Abbasov (Baş nazirin sabiq müavini) o zaman Prezident Administrasiyasının rəhbəri olan Ramiz Mehdiyevlə birlikdə müxalifəti yenidən dizayn edirdi. Kremldən gələn direktiv əsasında aparılan bu prosesdə bəzi şəxslərin müxalifət daxilində yerləşdirilməsi baş verdi. Gültəkin Hacıbəyli onlardan biri idi. Ehtimal olunur ki, Ramiz və Abbas “dayı”ları onu Milli Şuraya Cəmil Həsənlinin və Əli Kərimlinin “cazibə nəzarətçisi” kimi yerləşdirmişdilər…
Hazırda həm Gültəkin Hacıbəylinin Türkiyədə saxlanılması, həm də onun Bakıya ekstradisiya prosesinin aktivləşdirilməsi Ramiz Mehdiyev işi ətrafında aparılan istintaqda yeni mərhələnin başlandığını göstərir. Mənbələr hesab edir ki, qarşıdakı günlərdə daha çox siyasi fiqurun ifadəsinin alınması, hətta daha sensasion həbslərin aparılması baş verəcək.
