“Bir həsirdir, bir Məmmədnəsir”, yaxud “Bir Əlidir, bir Məmməd”
Ramiz Mehdiyev işi ilə bağlı evində axtarış aparılan və Dövlət Təhlükəsizliyi Xidmətində (DTX) dindirilən AXCP sədri Əli Kərimlinin saxlanılması məşhur deyimi yenidən gündəmə gətirdi və suallar yaratdı:
– Hardadır, Əli Kərimlinin iddia etdiyi “minlərlə tərəfdarı?”
– Hanı AXCP sədrini “sevənlər?”
Bəs necə oldu “xalq məni dəstəkləyir” iddiaları?
Artıq Əli Kərimli və müşaviri Məmməd İbrahim saxlanılıb, AXCP sədri və dəstəsinin Ramiz Mehdiyevin əlaqələrini, Azərbaycan dövlətinə qarşı oynanılan oyunları istintaq aydınlaşdıracaq. Amma Əli Kərimlinin arxasınca heç kimin gəlməməsi onun “minlərlə tərəfdarım var” iddialarını çürütdü. Əli Kərimlinin heç Rəşad Dağlıq qədər tərəfdarı və sevəni yox imiş. Meyxanaçı həbs ediləndə Yasamal rayon polis idarəsinin önünə bir neçə yüz insan toplaşmışdı, ona dəstək vermişdi. Əli Kərimli isə müşaviri Məmmədlə birlikdə saxlanılıb, amma “bir həsirdir, bir Məmmədnəsir”. Nə arxasınca dəstək verməyə gələn var, nə də axtarıb, soruşan.
Çünki Əli Kərimlinin “bir həsiri var, bir Məmmədi”. Onun “yüzminlərlə tərəfdar” dediyi dəstəsi yalnız virtual aləmdə saxta profillərlə yaratdıqları “trol ordusu”ndan başqa bir şey deyil. İş reallığa çatanda Əli Kərimlinin arxasınca gələcək bir nəfər belə tərəfdarı olmadı.
AXCP sədri sosial şəbəkələrdə hay-küy qaldıraraq, ölkədə yeganə “real müxalifət” olduğunu iddia edir, özünü “lider” kimi təqdim edirdi. Hətta, pafosun dozasını o qədər qaldırırdı ki, bəzən iddia etdiyi “minlərlə tərəfdarı”nı Koroğlunun “dəliləri” kimi göstərir, bu gün-sabah iqtidara gələcəklərini deyirdi.
– Əli, Vəli, Pirvəli…
– Hanı Əli Kərimlinin “dəliləri?”
Bəs, hanı AXCP sədrinin minlərlə tərəfdarı? Yoxdur, onlar heç vaxt gəlməyəcək, çünki real deyillər. “Tərəfdar ordusu” virtual aləmdə yaradılan illüziyadan başqa bir şey deyil, eynilə Əli Kərimlinin “liderliyi” haqda yaradılan yalan kimi…
Vasif Həsənli
Demokrat.az xəbər portalının baş redaktoru
