Türkiyənin Nəqliyyat və İnfrastruktur naziri Əbdülqədir Uraloğlu bildirib ki, KAIROS gəmisində olan 25 nəfərlik heyət xilas edilib, VIRAT adlı gəmidəki 20 heyət üzvünün sağlamlıq vəziyyəti yaxşıdır və qruplar hadisəyə müdaxilə edir.
Qara dənizdə sahildən 28 mil aralıda yanğın baş verən “KAIROS” gəmisindən xilas edilən 25 nəfər Kocaelinin Kandıra rayonundakı limana gətirilib.
Türkiyə Nəqliyyat və İnfrastruktur naziri Əbdülqədir Uraloğlu məsələ ilə bağlı açıqlama verib.
Nazir bildirib ki, Qara dəniz açıq sularında neft daşıyan KAIROS və VIRAT adlı ticarət gəmilərində baş verən partlayışlardan sonra aparılan işlər aidiyyəti qurumların tam koordinasiyası ilə həyata keçirilir.
Hadisə yerinə dərhal KEGM-10 və KEGM-9 sürətli təxliyə qayıqları, “Kurtarma-12” yedək gəmisi və “Nene Hatun” təcili müdaxilə gəmisi göndərilib.
KAIROS gəmisində olan 25 heyət üzvü Sahil Təhlükəsizliyi Baş İdarəsinə bağlı KEGM-10 qayığı tərəfindən xilas edilib.
Uraloğlu “VIRAT adlı gəmidə isə 20 heyət üzvünün sağlamlıq vəziyyətinin yaxşı olduğu barədə məlumat daxil olub. Sahil Təhlükəsizlik Qrupları hadisəyə müdaxilə edir”, – deyə məlumat verib.
Nazir prosesi bütün qurumların iştirakı ilə yaxından izləməyə davam etdiklərini əlavə edib.
