Xəzər Boru Kəməri Konsorsiumu (CPC) sisteminin dəniz terminalı noyabrın 29-i səhər saatlarında pilotsuz katerlərin hücumu nəticəsində zədələnib.
Bu barədə İnterpress.az konsorsiumun mətbuat xidmətinə istinadən məlumat verir.
“Bu gün Moskva vaxtı ilə saat 04:06-da (Bakı vaxtı ilə 05:06-da – red.) konsorsiumun dəniz terminalının akvatoriyasında pilotsuz katerlərin məqsədyönlü hücumu nəticəsində ikinci yanalma qurğusu ciddi zədələnib. Yükləmə və digər əməliyyatlar dayandırılıb, tankerlər CPC akvatoriyasından kənara çıxarılıb”, – məlumatda qeyd olunur.
Məlumata görə, Novorossiysk dəniz limanının kapitanı tərəfindən verilmiş göstərişə əsasən yükləmə əməliyyatları və digər əməliyyatlar dayandırılmış, tankerler CPC akvatoriyasından kənara çıxarılmışdır. CPC işçiləri və podratçıları arasında xəsarət alan yoxdur.
“Yanalma qurğusunun bundan sonra istismarı mümkün deyil. Terminalda yükləmə əməliyyatları pilotsuz kater və PUA təhlükəsi aradan qaldırıldıqdan sonra müəyyən edilmiş qaydalara uyğun olaraq həyata keçiriləcək”, – məlumatda qeyd olunur.
