Ukrayna Silahlı Qüvvələrinə məxsus dəniz dronları Novorossiysk limanı yaxınlığında Qazaxıstan neftinin yüklənməsi üçün istifadə olunan neft terminalına zərbə endirib.
NOCOMMENT.az xəbər verir ki, bu barədə “Kaspian Boru Kəməri Konsorsiumu” (KTK) məlumat yayıb.
Bildirilir ki, hücum səhər saat 4 radələrində baş verib. Avariyaya qarşı qoruma sistemləri avtomatik olaraq işə düşüb və boru kəmərləri dərhal bağlanıb. İlkin məlumata görə, Qara dənizə neft sızması qeydə alınmayıb.
KTK nümayəndələri bildiriblər ki, hücum nəticəsində neft yükləmə körpüsünün fəaliyyəti tam dayandırılıb və hazırkı vəziyyətdə onun istismarı mümkün deyil.
Konsorsium xatırladıb ki, bu, infrastrukturun hədəfə alınması ilə bağlı üçüncü hücumdur. Bundan əvvəl “Kropotkinskaya” neft nasos stansiyası və Novorossiyskdəki inzibati ofis dron hücumları nəticəsində zərər görmüşdü.
KTK əsasən Qazaxıstanın Tengiz, Kaşaqan və Karaçanaq yataqlarından hasil olunan nefti daşıyır. Təkcə 2024-cü ildə terminal vasitəsilə 63 milyon ton neft ötürülüb. Bu həcmin təqribən 74%-i xarici şirkətlərin yüküdür, o cümlədən Chevron, ExxonMobil, QazMunayQaz, Eni və Shell.
