Xəbər verildiyi kimi, "Airbus" A320 ailəsinə aid təyyarələr üçün genişmiqyaslı proqram təminatı geri çağırma əməliyyatı başladıb.
AFN.az xəbər verir ki, təxminən 6 min təyyarəni əhatə edən qərar intensiv günəş radiasiyasının uçuş nəzarət məlumatlarını poza biləcəyi aşkarlanandan sonra verilib.
"Airbus"dan verilən açıqlamada bildirilir ki, A320 ailəsinə aid əhəmiyyətli sayda təyyarədə təcili proqram yeniləməsi aparılacaq. Şirkət bir hadisədə aşkarlanan risk səbəbindən uçuş idarəetmə sistemləri üçün kritik məlumatların günəş radiasiyası tərəfindən pozula biləcəyini açıqlayıb.
Bu geniş geri çağırmanın dünya üzrə 11 300 A320 təyyarəsindən təxminən 6 minini əhatə edəcəyi gözlənilir.
Qeyd edək ki, "Azərbaycan Hava Yolları" QSC-nin (AZAL) istismarında da "Airbus" A320 təyyarələri var. QSC-dən verilən açıqlamada bildirilir ki, aviaşirkət “Airbus” şirkətindən rəsmi direktivlər daxil olan kimi təyyarə parkında operativ şəkildə texniki yoxlamalar aparıb:
"Yoxlamanın nəticələrinə əsasən, korreksiya tədbirlərinin görülməsi tövsiyə olunan üç təyyarə müəyyən edilib. Tövsiyələrə uyğun olaraq həmin təyyarələrin proqram təminatı əvvəlki stabil versiyaya qaytarılıb."
Qeyd edilən direktivlər “Airbus” tərəfindən A320 ailəsinə aid təyyarələrin idarəetmə sistemi ilə bağlı müəyyən nasazlıqlar aşkarlanandan sonra göndərilib. İstehsalçının məlumatına görə, güclü günəş şualanması zamanı uçuşun idarə olunmasında istifadə edilən bəzi məlumatlarda təhrif yarana bilər. Bununla əlaqədar proqram təminatının növbədənkənar yenilənməsi başlanılıb və istismarçılara müvafiq göstərişlər verilib.
AZAL tərəfindən bütün texniki məsələlərin vaxtında və tam şəkildə həll olunduğu, hazırda aviaşirkətin bütün təyyarələrinin ştat rejimində fəaliyyət göstərdiyi bildirilib.
Maraqlıdır, oktyabrın 20-də Sankt-Peterburq–Bakı reysində baş verən nasazlıq eyni səbəbdən ola bilərmi?
AZAL-ın mətbuat xidmətindən verilən cavabda qeyd olunub ki, iki hal bir-birindən fərqlidir:
"Oktyabrda təyyarənin şassisində nasazlıq baş vermişdi və bu barədə ictimaiyyətə məlumat verilmişdi. Bu isə proqram təminatı problemidir".
Qeyd edək ki, AZAL-ın saytında hazırda 4 "Airbus" təyyarəsinin istismarda olması göstərilir. Bunlardan ikisi A320 ailəsinə daxildir.
