Ukrayna Prezidenti Volodimir Zelenskinin Ofisinin sabiq rəhbəri Andrey Yermak istefa ərizəsini təqdim etdikdən bir neçə saat sonra cəbhəyə getdiyini açıqlayıb.
APA xəbər verir ki, bu barədə "New York Post" qəzeti məlumat yayıb.
"Mən cəbhəyə gedirəm və hər hansı bir repressiyaya hazıram. Mən dürüst və ləyaqətli insanam", - o bildidib.
Məlumatda həmçinin bildirilib ki, Ofisin sabiq rəhbəri artıq zənglərə cavab verməyəcəyi ilə bağlı üzr də istəyib.
O, cəbhəyə nə vaxt və necə getmək niyyətində olduğu və ya Ukrayna Silahlı Qüvvələrinə qoşulub-qoşulmayacağı ilə bağlı məlumat verməyib.
"24 fevral 2022-ci ildən Kiyevdə olmağıma baxmayaraq, rüsvay oldum və ləyaqətim qorunmadı. Buna görə də Zelenski üçün problem yaratmaq istəmirəm - cəbhəyə gedirəm. Ukraynaya xidmət etmişəm və 24 fevral 2022-ci ildə Kiyevdə idim. Bəlkə də yenidən görüşərik. Ukraynaya eşq olsun", - sabiq Ofis rəhbəri əlavə edib.
Qeyd edək ki, dünən səhər saatlarında Ukrayna Prezident Ofisinin rəhbəri Andrey Yermakın hökumət məhəlləsindəki mənzilində axtarış aparılıb. Daha sonra o Zelenskiyə öz istefa ərizəsini təqdim edib.
