Bakı, 28 noyabr, AZƏRTAC
Gömrük işinin təkmilləşdirilməsi ilə əlaqədar olaraq Azərbaycanda Avtomatlaşdırılmış Risk Analiz Sisteminin (ARAS) istifadəyə verilib. Bu sistemin istifadəyə verilməsindən sonra 2025-ci ilin ötən dövrü ərzində 300 min manatdan çox əlavə gömrük ödənişləri dövlət büdcəsinə köçürülüb.
AZƏRTAC xəbər verir ki, xəbər verir ki, bu sözləri Dövlət Gömrük Komitəsinin Hava Nəqliyyatı Baş Gömrük idarəsinin Logistika Mərkəzinin Gömrük Postunun rəisi Rövşən Mahmudzadə jurnalistlərə açıqlamasında bildirib.
Onun sözlərinə görə, bu ildən ARAS vasitəsilə poçt bağlamalarına gömrük nəzarəti həyata keçirilir.
“Gömrük yoxlamaları risk əsaslı sistem vasitəsilə təşkil olunur. Daşıyıcı şirkətlər tərəfindən həmin bağlamalar gömrük yoxlamasına təqdim olunur. Yoxlamalar zamanı aşkarlanan qanunsuz faktlara əsasən səhv bəyan etmələr daxildir. Vətəndaşlar tərəfindən gömrük dəyərinin səhv bəyan edilməsi, həmçinin malların saylarının düzgün göstərilməməsi əlavə yoxlamaya səbəb olur. Gün ərzində orta hesabla 20-25 min bağlama gömrük nəzarətindən keçirilir. Avtomatlaşdırılmış Risk Analizi Sistemi Dövlət Gömrük Komitəsinin mütəxəssisləri tərəfindən hazırlanıb və 2024-cü ilin yanvar ayından tətbiqinə başlanılıb. Süni intellekt əsaslı maşın yük və nəqliyyat vasitələrinin sürətli sərhəd keçidinə, çevik gömrük rəsmiləşdirilməsinə şərait yaradır, biznes subyektlərinin əməliyyat xərclərini azaldır”, - deyə R. Mahmudzadə vurğulayıb.
