London, 28 noyabr AZƏRTAC
Fransa hökuməti Böyük Britaniyanın aylardır davam edən təzyiqlərindən sonra La-Manş boğazında kiçik qayıqların qarşısını almağa razılıq verib.
AZƏRTAC BBC-yə istinadla xəbər verir ki, bu qərar Böyük Britaniyanın Baş naziri Kir Starmerin Fransa Prezidenti Emmanuel Makrona məktub göndərərək yeni tədbirləri dəstəkləməyə çağırışından sonra qəbul olunub. Starmer məktubunda hazırda boğazda effektiv çəkindirici tədbirin mövcud olmadığını bildirib.
Fransanın dəniz polisindən verilən məlumata görə, ölkənin təhlükəsizlik qüvvələri bundan sonra qayıqları dənizdə, lakin yalnız sərnişinləri götürməzdən əvvəl dayandıra biləcəklər. Qayıqlar sahildən çıxarkən müdaxilə etmək isə həm polis əməkdaşları, həm də mühacirlər üçün çox riskli hesab olunduğundan, Fransa polisinin indiyədək buna cəhd etmədiyi qeyd olunur.
Dəniz polisindən bildirilir ki, yeni müdaxilələrin məqsədi ilk növbədə insan həyatını qorumaqdır. Bununla yanaşı, polis qayıqları dayandırmaq üçün tikanlı torların və ya bərkitmə şəbəkələrinin istifadəsini istisna edib. Daha əvvəl bəzi mənbələr bu şəbəkələrin qayıqların pərvanələrinə dolaşdırılaraq hərəkətinin məhdudlaşdırılması üçün nəzərdən keçirildiyini yazmışdı.
Bu qərar Fransa üçün əhəmiyyətli bir dönüş sayılır. Yay aylarında daxili işlər naziri Bruno Retailleau tərəfindən qısamüddətli daha sərt yanaşma tətbiq edilsə də, mövcud dəniz hüququ və polis qaydaları səbəbindən davamlı bir həll tapılmamışdı.
Aytən Abbaslı
AZƏRTAC-ın xüsusi müxbiri
London
