Cebheinfo saytından alınan məlumatlara görə, ain.az xəbər verir.
Şimali Koreya rus dili tədrisində mühüm addım atıb.
"Cebheinfo.az" xəbər verir ki, Rusiya təbii sərvətlər və ekologiya naziri Aleksandr Kozlov Şimali Koreya məktəblərində rus dilinin 4-cü sinifdən etibarən məcburi xarici dil kimi tədris proqramına daxil edildiyini açıqlayıb.
İki ölkə arasında hökumətlərarası komissiyanın həmsədri olan Kozlov bu qərarın ikitərəfli münasibətlərin inkişafı çərçivəsində qəbul edildiyini bildirib.
Şimali Koreyanın bu addımı iki ölkə arasında güclənən təhsil əməkdaşlığının yalnız bir hissəsidir. Kozlov qeyd edib ki, Rusiyada 3 mindən çox tələbə Koreya dili öyrənir, onların əksəriyyəti bu dili ikinci və ya üçüncü xarici dil kimi seçir.
Təhsil mübadiləsi yalnız dil sahəsi ilə məhdudlaşmır; bankçılıq, enerji, səhiyyə və geologiya sahələrində çalışan mütəxəssislər üçün əlavə təlim proqramları da təşkil olunur.
İki ölkə arasındakı akademik əlaqələr hər il daha da güclənir. 2024–2025-ci tədris ilində 96 Şimali Koreya vətəndaşı Rusiyada ali təhsil alır. Bu tələbələrin əsasən Uzaq Şərq Federal Universiteti (DVFU), MGIMO və RUDN Universitetinə qəbul olunduğu bildirilir.
Rusiya tərəfində isə 300 rus tələbə koreya dili təhsili alır. Bundan əlavə, gələn il Kim Çol Cu Pedaqoji Universiteti nəzdində Şimali Koreyada Açıq Rus Dili Tədris Mərkəzi fəaliyyətə başlayacaq.
Bu genişmiqyaslı dil və təhsil təşəbbüsü Moskva–Pxenyan xəttindəki strateji yaxınlaşmanın təhsil sahəsindəki ən konkret əks-sədası kimi önə çıxır.
Nigar Hacılı
"Cebheinfo.az"
Problemlərinizi bizə yazın, şahidi olduğunuz hadisələri çəkib göndərin
Ən son xəbərləri və yenilikləri almaq üçün ain.az saytını izləyin.
