Mütəxəssislər ilk dəfə olaraq yaşlı insanlarda korluğun əsas səbəblərindən biri olan makulyar degenerasiyalı xəstələrdə görməni bərpa ediblər. Araşdırmada xəstəliyin ağır mərhələsindən əziyyət çəkən 71–86 yaş arası altı nəfər iştirak edib. Tədqiqatçılar hər bir xəstənin gözünə 50 min ədəd kök hüceyrə yeridiblər. Bu hüceyrələr makulyar degenerasiya zamanı məhv olan torlu qişanın piqment epitel hüceyrələrinə çevrilə bilir. Tədqiqatın əsas məqsədi üsulun təhlükəsizliyini yoxlamaq idi, lakin nəticələr gözləniləndən daha yaxşı olub. Hüceyrələrlə bağlı heç bir fəsad qeydə alınmayıb və xəstələrdə görmə qabiliyyəti yaxşılaşıb.
İlkin görmə qabiliyyəti ən zəif olan üç iştirakçıda müşahidə olunan dəyişikliklər təsirli olub, bir ildən sonra onlar orta hesabla 21 hərf daha çox görə biliblər. Tədqiqatçılar qeyd edirlər ki, xəstəliyin quru formasının gec mərhələsində olan pasiyentlərdə belə yaxşılaşma əvvəllər müşahidə edilməyib. Hazırda mütəxəssislər daha yüksək dozalı hüceyrələrlə sınaqları davam etdirirlər.
Ülkər XASPOLADOVA,
“Azərbaycan”
