ABŞ Prezidenti sammiti Mayamidəki öz qolf kurortunda keçirəcək...
Poliqon xəbər verir ki, ABŞ Prezidenti Donald Tramp gələn il keçiriləcək G20 sammitini Mayamidə yerləşən özəl qolf kurortunda təşkil edəcək və iştirakçı siyahısını tam şəkildə özü formalaşdıracaq. Bloomberg yazır ki, Tramp sosial şəbəkədə yaydığı açıqlamada builki G20-yə sədrliyi həyata keçirən Cənubi Afrikanı dəvət etməyəcəyini bildirib. Bu qərar illərlə formalaşmış diplomatik protokolu poza bilər, çünki ənənəyə görə, ev sahibi ölkə blokun daimi üzvlərinə selektiv yanaşa bilməz.
Məlumata görə, bu addımdan sonra qlobal səviyyədə ciddi suallar yaranıb: sammitə kimlər çağırılacaq, kimlər siyahıdan çıxarılacaq? Boş qalan yeri hansı ölkənin tutacağı da hələ dəqiqləşməyib. G20-nin digər üzvləri isə çətin seçim qarşısındadır. Onlar ya Trampın addımını nəzərə almadan sammitə qatılmalı, ya da Cənubi Afrikaya həmrəylik nümayiş etdirərək tədbiri boykot etməlidirlər. Lakin ikinci variantın Vaşinqtondan gələcək mümkün cavab tədbirləri, o cümlədən ticarət tarifləri, texnoloji sanksiyalar və ya daha ciddi addımlar ilə nəticələnə bilər.
Analitiklər hesab edirlər ki, Trampın bu qərarı G20 daxilində siyasi balansı dəyişə, bəzi ölkələri Vaşinqtonla münasibətlərini yenidən nəzərdən keçirməyə məcbur edə və qlobal iqtisadi koordinasiya prosesində yeni gərginlik ocaqları yarada bilər. ABŞ administrasiyasının bu qərarının beynəlxalq səviyyədə necə qarşılanacağı və iştirakçı ölkələrin hansı mövqe tutacağı yaxın aylarda dünya siyasətinin əsas müzakirə mövzularından birinə çevriləcək.
Poliqon.info
