Bakı, 27 noyabr, AZƏRTAC
Türk Dövlətləri Təşkilatı (TDT) çərçivəsində Azərbaycanın mövqeyi barədə danışarkən, qeyd etməliyəm ki, bu ölkə bütün proseslərdə son dərəcə aktiv iştirak edir. Bu aktivlik, ilk növbədə, media subyektləri arasında əməkdaşlıq məsələlərində özünü açıq şəkildə göstərir.
Bu sözləri AZƏRTAC-a məxsusi müsahibəsində Qazaxıstanın “Xabar” Agentliyini sədrinin müavini Dauletxan Jiyenkulov deyib.
Azərbaycan və Qazaxıstan arasındakı əməkdaşlığın yalnız Türk Dövlətləri Təşkilatı çərçivəsində olmadığını vurğulayan müavin əlavə edib: “Biz Qazaxıstanda da Azərbaycan tərəfi ilə çox sıx və səmərəli əməkdaşlıq edirik. Məsələn, “Xabar” Agentliyi bu günlərdə “Baku TV” ilə qarşılıqlı fəaliyyət haqqında memorandum imzalayıb. Gələn il Azərbaycan Televiziyası ilə də memorandumun imzalanmasını planlaşdırırıq. Bu da onu göstərir ki, Azərbaycan tərəfi həm çoxtərəfli, həm də ikitərəfli formatda bütün proseslərdə fəal və təşəbbüskar tərəfdir.
Media sahəsində yeniliklər və bu tədbirlərdən gözləntilərimizə gəldikdə isə, qeyd etmək istəyirəm ki, bu, çox böyükdür. Çünki bu gün biz elə bir dövrdə yaşayırıq ki, qeyri-dəqiq məlumatlar, saxta xəbərlər, manipulyativ paylaşımlar və müxtəlif dezinformasiya formaları sosial şəbəkələr vasitəsilə son dərəcə sürətlə yayılır. Bu reallıq xoşumuza gəlsə də, gəlməsə də, informasiya operativliyinə görə sosial şəbəkələrin bir çox rəsmi mənbələri qabaqladığını qəbul etməliyik”.
Dauletxan Jiyenkulov dövlət mətbuat xidmətlərinin və rəsmi qurumların informasiya mübadiləsində həm operativ, həm də dəqiq fəaliyyət göstərməli olduğuna diqqət çəkərək deyib: “Dezinformasiyaya yol verməmək, düzgün və etibarlı məlumatı vaxtında çatdırmaq bu gün media sahəsində ən kritik məsələdir. Bu səbəbdən əməkdaşlıqlar və müzakirələr bizim üçün çox vacibdir”.
