Ryabkov Ankoric sammitində razılaşdırıldığı iddia edilən kompromislərə münasibət bildirib...
Poliqon xəbər verir ki, Rusiya xarici işlər nazirinin müavini Sergey Ryabkov ölkəsinin Ukraynadakı hərbi kampaniya (“SVO”) ilə bağlı mövqeyinin dəyişmədiyini bəyan edib. O, Rusiyanın “güzəştə getmək” və ya əsas strateji yanaşmalarından “imtina etmək” niyyətində olmadığını vurğulayıb. "RIA Novosti" Agentliyi Ryabkovun sözlərini sitat gətirərək yazır ki, Moskvanın “qırmızı xətləri” dəyişməz olaraq qalır.
Rusiya rəsmisi həmçinin ABŞ prezidenti Donald Tramp ilə Rusiya prezidenti Vladimir Putin arasında Alyaskanın Ankoric şəhərində keçirilmiş gizli sammit barədə yayılan məlumatlara da toxunub. Mətbuatda iddia olunur ki, görüşdə tərəflər bir sıra mübahisəli məsələlər üzrə ilkin kompromis variantlarına yaxınlaşıblar. Ryabkov isə bu barədə danışarkən bildirib:
“Ankoricdəki müxtəlif elementlər kompromis qərarlar kimi təqdim olunsa da, bu, Rusiyanın öz prinsipial mövqelərindən geri çəkilməsi demək deyil”.
Rus diplomatın sözlərinə görə, Rusiya tərəfi yalnız öz maraqlarına uyğun olan diplomatik yanaşmaları nəzərdən keçirir və heç bir qərar ölkənin strateji hədəflərini zəiflətməməlidir.
Ryabkovun bu açıqlaması Ukrayna üzrə ABŞ–Rusiya danışıqlarının intensivləşdiyi, eyni zamanda Tramp administrasiyasının müxtəlif kanallarla Moskva ilə təmaslarının genişləndiyi bir dövrə təsadüf edir. Rusiya XİN rəsmisinin sərt mövqeyi Kreml daxilində kompromis ehtimallarına dair yayılan fikirlərin Moskva tərəfindən açıq şəkildə təkzib olunması kimi qiymətləndirilir.
Poliqon.info
