ain.az, Gununsesi saytından verilən məlumata əsaslanaraq xəbər yayır.
Bakıya səfərin yekunlarına dair keçirilən mətbuat konfransında ekspert Naira Sultanyan bildirib ki, İrəvandan gələn vətəndaş cəmiyyəti nümayəndələrinin Bakıda saxlanılan erməni əsilli şəxslərlə görüşmək müraciəti rədd edilib.
Bu barədə məlumatı erməni KİV-i yayıb.
İrəvan Mətbuat Klubunun fəxri prezidenti və görüşün iştirakçılarından biri Boris Navasardyan da açıqlamasında bildirib ki, əgər görüş proqramda yer almayıbsa, bu, həmin tələbin nəzakətli şəkildə qəbul edilməməsi anlamına gəlir:
“Bizə səfərin gündəliyi təqdim olunanda bununla bağlı iradlarımız oldu. Biz görüş istəmişdik. Gündəlikdə belə bir görüşün olmaması bunun nəzakətli şəkildə rədd edilməsi deməkdir”.
Məsələ ilə bağlı Gununsesi.info -ya danışan hərbi ekspert Ədalət Verdiyev qeyd edib ki, ictimai xadimlərin Ermənistandan Bakıya gəlməsi və burada Azərbaycan hərbi məhkəməsində təqsirləndirilən və ittiham olunan şəxslərlə görüş barədə təklif vermələri sağlam məntiqə və qanunlarımıza ziddir:
“Azərbaycan və Ermənistan arasında vətəndaş cəmiyyətləri, ictimai təşkilatlar səviyyəsində əlaqələrin qurulması özü-özlüyündə müsbət bir addımdır. Lakin bu addımlar hər iki tərəfdə mövcud olan düşmənçilik münasibətlərinin aradan qaldırılmasına yönəlib.
Bunun bir neçə səbəbi var. İlk növbədə, Azərbaycanda ittiham olunan erməni əsilli şəxslərin əksəriyyəti Qarabağda anadan olub, Qarabağda Azərbaycana qarşı cinayətlər törədib və bu şəxslərin Ermənistana ilk növbədə aidiyyəti yoxdur. Digər tərəfdən isə həmin erməni əsilli şəxslər günahlarının böyük bir hissəsini artıq etiraf ediblər və bizim qanunvericilik məhkəmə qərarı olmayana qədər saxlanılan və təqsirləndirilən şəxslərlə yalnız onun ailə üzvlərinin və vəkillərinin görüşməsinə icazə verir.
Gələn şəxslərdən heç biri saxlanılan erməni əsilli şəxslərin vəkili statusunu daşımır. Digər tərəfdən həmin şəxslər müvafiq müddətlər çərçivəsində öz ailələri ilə görüntülü əlaqə saxlayırlar. Vəkilləri ilə həm məhkəmə iclasında, həm də ondan sonrakı dövrdə görüşürlər”.
Ədalət Verdiyev qeyd edib ki, buna görə də gələn bu şəxslərin məsələni Azərbaycanda mühakimə edilən terrorçu və cinayətkarların azad olunması məsələsinə yönəltməsi tamamilə qəbul edilməz bir təklifdir:
“Bu təklif yumşaq şəkildə Azərbaycan tərəfindən artıq rədd edilib, yəni həmin görüşə icazə verilməyib. Gələcəkdə də düşünürəm ki, proseslər yalnız və yalnız Azərbaycanın mövcud qanunvericiliyi çərçivəsində həyata keçiriləcək.
Əgər Azərbaycana gələn Ermənistan ictimai fəalları həqiqətən də erməni əsilli şəxslərin həyatından bu qədər dərin narahatlıq keçirirlərsə, Rusiyanın, Ukraynanın, Qazaxıstanın və çox sayda digər ölkələrin həbsxanalarında kifayət qədər erməni cəza çəkir. Buyursunlar, getsinlər, onların hamısını ziyarət etsinlər. Ondan sonra baxarıq biz.
Azərbaycan bu proseslərə necə reaksiya verəcək? Odur ki, vəziyyəti qəlizləşdirməyə çalışmasınlar. Biz əgər sülhdən bəhs ediriksə, sülh istiqamətində addımlar atırıqsa, onlar da abırsız və həyasız addımlardan çəkinsinlər. Ən azından, daha əvvəl baş verən proseslərdən özləri üçün bir dərs çıxarsınlar”.
Şəbnəm Rəhimova
Gununsesi.info
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
