ABŞ Ədliyyə Nazirliyi azyaşlı qızlara qarşı fahişəlik şəbəkəsi qurmaq ittihamı ilə mühakimə olunduğu vaxt ölən Cefri Epşteyn işi üzrə böyük münsiflər heyəti sənədləri üzərindəki möhürün götürülməsi tələbinə yenidən müraciət edib.
ABŞ Ədliyyə Nazirliyinin açıqlamasında bildirilib ki, Epşteyn işi ilə bağlı dosyelərdəki böyük münsiflər heyəti sənədlərinin açıqlanması vacibdir.
Nazirliyin açıqlaması Epşteyn dosyelərinin ictimaiyyətə açıqlanmasını nəzərdə tutan “Epşteyn Dosyelərinin Şəffaflıq Qanunu”nun ötən həftə ABŞ Konqresi tərəfindən təsdiqlənməsindən və Prezident Donald Trampın imzalayaraq qanunlaşdırmasından sonra gəlib.
Prokuror Cey Kleyton nazirlik adından Manhetten federal məhkəməsinə etdiyi müraciətdə hakimdən sənədlərin açıqlanmasına icazə verən sürətli qərar çıxarmasını tələb edən ərizə təqdim etdiklərini bildirib.
Nazirlik müraciətində Konqresin qəbul etdiyi son qanunun böyük münsiflər heyəti qeydlərinin açıqlanmasını tələb edən ən yeni hüquqi tənzimləmə olduğunu vurğulayaraq, həmin qeydlərin ictimaiyyətə açıqlanmasını istəyib.
Hakim Riçard Berman isə daha əvvəl Tramp administrasiyasının Epşteyn böyük münsiflər heyəti protokollarının ictimaiyyətə açıqlanması tələbini rədd etmişdi.
Epşteynin 2019-cu ildə işinə baxan hakim Berman avqustda bu tələbi rədd edərkən, protokollarda yer alan məlumatların artıq Ədliyyə Nazirliyinin sərəncamında olduğunu və böyük münsiflər heyəti sənədlərindəki digər məlumat və materialların əhəmiyyətsiz olduğunu bildirmişdi.
Bununla yanaşı, Epşteyn işi üzrə zərərçəkənlərdən bəziləri həmin protokolların ictimaiyyətə açıqlanacağı halda öz adlarının da ifşa ediləcəyi narahatlığı ilə bu sənədlərin açıqlanmasını istəmədiklərini ifadə etmişdilər.
