İndoneziya 1,2 milyon barel neft daşıyan 1997-ci il istehsalı tankeri satışa qoyur
İnterpress.az xəbər verir ki, bu barədə “Jakarta Globe” məlumat yayıb.
İndoneziya 2 dekabrda müsadirə olunmuş İran neft tankeri MT Arman 114-ü və onunla birlikdə daşıdığı 1,2 milyon barel xam nefti hərraca çıxarmağa hazırlaşır.
Baş Prokurorluq ilkin dəyəri 70 milyon dollar, iştirak üçün tələb olunan depoziti isə 7 milyon dollar olaraq açıqlayıb.
1997-ci ildə Cənubi Koreyada tikilmiş tanker bu ilin 10 iyulunda Batam dairə məhkəməsinin qərarı ilə saxlanılmışdı. Həmin vaxt misirli kapitan, 28 nəfərlik ekipaj və daha 3 sərnişin nəzarətə alınmışdı.
Kapitan dənizə qanunsuz tullantı axıtmaqda təqsirli bilinərək 7 il həbs və 300 min dollar cərimə edilib.
Araşdırma dəniz təhlükəsizliyi patrulunun iki tankerin yan-yana dayanıb AIS sistemini söndürdüyünü görməsi ilə başlayıb.
İstintaq nəticəsində məlum olub ki, İran tankeri MT Arman 114 Kamerun bayrağı altında üzən MTS Tinos ilə qanunsuz şəkildə neftin gəmilərarası ötürülməsi əməliyyatı həyata keçirirmiş.
Xuraman Etibarlı
İnterpress.az
