Musavat.com xəbər verir ki, ABŞ vitse-prezidenti Cey Di Vensin həyat yoldaşı Uşa Vensin nişan üzüyü olmadan görünməsi Vaşinqton siyasi dairələrində və sosial şəbəkələrdə geniş müzakirələrə səbəb olub.
19 noyabr tarixində Uşa Vens Melaniya Tramp ilə birlikdə dəniz piyada korpusunun Kemp-Lejen bazasını ziyarət edib. Həm qarşılanma zamanı, həm də hərbçilərlə görüş və məktəb səfəri zamanı çəkilmiş bütün fotolarda onun barmağında üzüyün olmaması diqqətdən yayınmayıb.
Bu detal dərhal fərziyyələri artırıb. Xatırladaq ki, bir müddət əvvəl Cey Di Vens memorial tədbirdə mərhum Çarli Kirk-in həyat yoldaşını mehriban tərzdə qucaqlaması və daha əvvəl Uşa Vensin katolik dininə keçmək istəməməsindən şikayətləndiyi açıqlaması sosial media müzakirələrini daha da qızışdırmışdı. Hətta bəziləri Uşanın hindu mənşəli olmasının Vensin 2028-ci il seçki planlarına təsir edə biləcəyini iddia etmişdi.
Lakin faktlar vəziyyətin tam əksini göstərir. Sosial şəbəkə istifadəçiləri artıq Uşa Vensin keçmiş tədbirlərdə də tez-tez üzüksüz göründüyünü sübut edən fotolar paylaşıblar. ABŞ mediası məsələ ilə bağlı rəsmi açıqlama da alıb.
USA Today-in sorğusuna cavab verən Uşa Vensin mətbuat katibi yayılan iddialara belə aydınlıq gətirib:
Uşa Vens “üç kiçik uşağın anasıdır, çox qab yuyur, uşaqlara tez-tez vanna hazırlayır və bəzən üzüyünü taxmağı sadəcə unudur”.
Beləliklə, Vaşinqtonda “soyuqluq” şayiələrini qızışdıran görüntü sadəcə adi məişət vərdişinin nəticəsi imiş.
Musavat.com
