Bu gün Azərbaycanın Xalq artisti, unudulmaz sənətkar Yaşar Nurinin xatirə günüdür – onun vəfatından artıq 13 il keçir.
"Yeni Sabah" xəbər verir ki, Yaşar Nuriyev 1951-ci il sentyabrın 3-də Bakı şəhərində, aktyor Məmmədsadıq Nuriyevin ailəsində dünyaya gəlmişdi. İlk dəfə səhnəyə cəmi on bir yaşında – Azərbaycan Dövlət Musiqili Komediya Teatrında səhnələşdirilən “Toy kimindir?” tamaşasında Tapdıq obrazını canlandıraraq çıxmışdı.
1968-ci ildə paytaxtdakı 173 nömrəli məktəbi bitirən sənətkar elə həmin il Azərbaycan Dövlət İncəsənət İnstitutunun dram və kino aktyorluğu fakültəsinə qəbul olunmuşdu. Tələbəlik illərində o, “Sevil”də Balaş, “Toy”da Salmanov, “Günahsız müqəssirlər”də Neznamov kimi xarakterik obrazlar yaradaraq diqqət çəkmişdi.
1972-ci ildə institutdan məzun olduqdan sonra bir il hərbi xidmətdə olub və daha sonra tədris teatrında çalışmağa başlayıb. 1974-cü ilin 1 dekabrında isə Akademik Milli Dram Teatrının baş rejissoru Tofiq Kazımovun dəvəti ilə teatr truppasına qoşulub.
Səhnənin tanınmış simalarından olan Yaşar Nuri həm də kino sahəsində böyük şöhrət qazanmışdı. O, 50-yə yaxın bədii filmdə çəkilmiş, televiziya üçün hazırlanan yüzdən artıq tamaşa, satirik səhnəcik və kompozisiyalarda iştirak etmişdir.
Ramiz Həsənoğlunun quruluş verdiyi “Yollar görüşəndə...”, “Ömrün yolları”, İsi Məlikzadənin “Qatarda”, Anarın “Evləri köndələn yar”, Mövlud Süleymanlının “Kökdən düşmüş piano”, Hüseyn Cavidin “Topal Teymur”, həmçinin Tariyel Vəliyevin çəkdiyi “Səni axtarıram”, “Bağışla”, “Səndən xəbərsiz” trilogiyası, İslam Səfərlinin “Göz həkimi”, Əbdürrəhim bəy Haqverdiyevin əsərləri əsasında ərsəyə gələn “Ac həriflər” televiziya tamaşaları onun sənət yolunda mühüm mərhələlər olub.
Kino karyerasına rejissor Şamil Mahmudbəyovun “Dörd bazar günü” filmində canlandırdığı Seyran obrazı ilə başlayıb. “Əzablı yollar” filmindəki kiçik div, “Yol əhvalatı”ndakı Makintoş rolu isə tamaşaçılar tərəfindən böyük maraqla qarşılanıb.
Vaqif Mustafayevlə əməkdaşlığı nəticəsində ərsəyə gələn “Musiqili xaş” və “Bəyin oğurlanması” filmlərindəki tiplər, xüsusilə də İsrafil obrazı sənətkarın unudulmaz işləri sırasında xüsusi yer tutur. Onun “Yaramaz” filmində Maşallah, “Lətifə”də Məmməd, “Qətl günü”ndə Mahmud doktor, “Nə gözəldir bu dünya...”da Asim Əliyeviç rolları tamaşaçı yaddaşına həkk olunub. “Hər şey yaxşılığa doğru”, “Nakəs”, “Fransız”, “Yoxlama” kimi filmlər də aktyorun fərqli yaradıcılıq palitrasını göstərir.
Bu obrazları sevdirən ən əsas cəhət isə Yaşar Nurinin böyük istedadı və sənətə olan dərin bağlılığı idi.
Sənətkar uzun sürən xəstəlikdən sonra 2012-ci il noyabrın 22-də Bakıdakı Dövlət Gömrük Komitəsi Tibbi Xidmətinin Mərkəzi Gömrük Hospitalında dünyasını dəyişib.
Telegram kanalımız
